تعلیمی بشخ اتون گنڈوک بندغ آک زمواری تے دیانت داری اٹ سر ایتر،یاسراقبال دشتی

تربت، ڈپٹی کمشنر کیچ یاسر اقبال دشتی نا کماشی ٹی ڈسٹرکٹ ایجوکیشن گروپ نا اہم ءُ دیوان اس اڈ ہلک، ہراٹی ضلع کیچ انا تعلیمی ادارہ غاتا جم کارکڑد، استاد و ایلو ملازم آتا حاضری، تعلیمی نظم و ضبط، اسکول آتا مانیٹرنگ و محکمہ تعلیم نا کنڈ آن انتظامی گچینی کن کروک گام گیج آتا جم جاچ ءِ ہلنگا۔ دیوان اٹی ڈسٹرکٹ ایجوکیشن آفیسر کیچ امجد شہزاد، ڈسٹرکٹ آفیسر ایجوکیشن کیچ اصغر علی، آر ٹی ایس ایم نا عبدالحلیم بلوچ، کل تحصیل تا ڈپٹی ڈسٹرکٹ ایجوکیشن افسر (ڈی ڈی اوز) تتون اوار محکمہ تعلیم نا ایلو تعلقدار افسرآک بشخ ہلکر۔ دیوان اٹ ڈسٹرکٹ ایجوکیشن آفیسر کیچ امجد شہزاد ڈپٹی کمشنر کیچ ءِ ضلع ٹی تعلیمی باندات‘ اسکول آتا چاروکی، ملازم آتا حاضری و محکمہ ئی کارکڑد نا بابت جم بریفنگ ترسا پارے کہ برجا تُو اٹ زمواری تاسر تننگ و تعلقدار انتظامی باندات آتا رد اٹ 67 شوکاز نوٹس جاری کننگانو، وخت اس کہ 16 ملازم آتا تنخواہ تیان کاٹ کننگانے۔ ڈپٹی کمشنر کیچ یاسر اقبال دشتی دیوان نا اٹ تعلیمی بشخ انا گچینی‘ سرکاری اسکول آتیٹی تدریسی عمل نا باقاعدگی و طالب علم آتے آب اٹنگا تعلیم نا فراوانی نا اہمیت آ زور شاغا۔ او پیدوار کرے کہ ضلع ٹی تعلیمی نظام ءِ گچین جوڑ کننگ کن تعلقدار افسر، تحصیل کہول انازموار و اسکول انتظامیہ نا نیام اٹ گچین رابطہ و اسیجائی کوشست آک المی ءُ۔ او دا ہیت آ زور شاغا کہ تعلیمی ادارہ غاتیٹی استاد و ایلو ملازم آتا حاضری ءِ پک کننگ، تدریسی عمل اٹی اڑاند آتے مر کننگ، اسکول آتا باقاعدہ مانیٹرنگ و محکمہ ئی زمواری تا سرتننگ آ خصوصی چکار کننگے۔ داڑتون اوار تعلیمی ادارہ غاتا کارکڑد نا ریسہ اٹ جاچ ہلنگے تاکہ ہراڑے ہم انتظامی یا تدریسی نزوریک مریر ہموڑے وخت آ اصلاحی گام گیج کننگے۔ ڈپٹی کمشنر کیچ یاسر اقبال دشتی تعلیمی بشخ اتون تعلقدار افسر آتیا زور شاغا کہ او تینا زمواری تے دیانت داری، سنجیدگی و کسبی وڑ اٹ سر ایترو طالب علم آتا تعلیمی آخبت ءِ مقدم تخسا مچ آ ضلع ٹی تعلیم نا آب ءِ گچین کننگ کن پورو کڑد ادا کیر۔