دیر ننا ریڈلائن ءِ، پاکستان نا دیر ءِ توننگ نا کوشست آتے جنگ تکنگک،وزیراعظم شہباز شریف

اسلام آباد، وزیراعظم شہباز شریف پارینے کہ دیر ننا ریڈلائن ءِ و پاکستان نا دیر ءِ توننگ نا کوشست اس جنگی گام گیج تکنگک۔ پاکستان و مالدیپ نا نیام اٹی جتا بشخ آتیٹی مفاہمتی یادداشت آتا ہل وتس نا دود اڈ ہلک ہراٹی وزیراعظم شہباز شریف و مالدیپ نا صدر ڈاکٹر معیزو ساڑی ئس۔ دا وخت آ گپ و تران کرسا وزیراعظم پارے کہ ہڑتوم آ ملک آتا تعلقداریک جتاجتا بشخ آتیٹی سوگو مسنو، زرگزرانی کمکاری، واپاری و دفاع تون اوار چندی بشخ آتیٹی کمکاری آ ہل وتس کننگا، مالدیپ نا طالب علم آتا بھلو کچ اس پاکستانی ادارہ غاتیٹی خواننگ اٹی ءِ وخت اس کہ پاکستانی ڈاکٹر و کمکار طبی کارندہ غاک مالدیپ اٹی انسانیت نا خذمت ءِ کننگ اٹی ءُ، ایلم ملک انا حیثیت اٹ مالدیپ نا ایلو گرج آتے ہم پورو کرسا خوشی مریک‘ او پارے کہ مالدیپ فلسطین نا ویل انا پبی مخ تفی ءِ کیک، پاکستان ہم آجو و وتواجہ فلسطینی ریاست کن اصولی موقف نا مخ تفی ءِ برجا تخک۔ شہباز شریف پارے کہ سندھ طاس معاہدہ نا تینا خود آن معطلی نا بھارتی فیصلہ ءِ منپنہ‘ جہانی کہول آ منوک معاہدہ غاتیا عملدرآمد کل ملک آتا زمواری ءِ، پاکستان نا پاش موقف ءِ کہ دیر ننا ریڈلائن ءِ و پاکستان نا دیر ءِ توننگ نا کوشست اس جنگی گام گیج تکنگک۔ دا وخت آ مالدیپ نا صدر ڈاکٹر معیزو پارے کہ ہڑتوم آ ملک آتا سفارتی تعلقداری تا 60 سال تین پہ تینی کمکاری آ تالان ءُ، تعلیم، جانجوڑی و واپاری تون اوار جتا بشخ آتیٹی کمکاری ءِ ودفک۔ ڈاکٹر معیزو مستی پارے کہ پاکستان، مالدیپ بزنس فورم اٹی واپاریو زرگزرانی کمکاری نا پوسکن آ کسرک ملنگرہ، یوتھ ایکسچینج پروگرام نا رد اٹ ڈل آتا ہن وبر ودفنگک‘ اے آئی، ڈیجیٹائزیشن تون اوار پوسکنوڑ ٹیکنالوجی آن فائدہ ہرفنگ وخت انا گرج ءِ۔