ملک و قوم انا شونداری ٹی پوسکن وڑ انفراسٹرکچر نا بنداوی ءُ کڑد اسے،گورنر بلوچستان جعفر مندوخیل

کوئٹہ، گورنر بلوچستان جعفرخان مندوخیل تون صوبائی وزیر مواصلات و تعمیرات و پاکستان مسلم لیگ (ن) نا پارلیمانی لیڈر میر سلیم احمد کھوسہ اوڑدہی کرے ہراٹی صوبہ ٹی انفراسٹرکچر نا شونداری، تفوئی ڈٹ آتا جوان ڈٹ بندی بندی و دوئی وسیلہ غاتا جوان کاریم اٹ اتنگ تون تعلقدار باندات آتیا گپ وتران کننگا۔ گورنر بلوچستان جعفرخان مندوخیل دا وخت آ پارے کہ ملک و قوم انا تعمیر و شونداری ٹی سوگو، مدامگی و پوسکنوڑ انفراسٹرکچر نا اہم کڑد ءِ۔ سڑک، پول و ایلو بنداوی آسراتی تا آب اٹ تفنگ نئے بیرہ الس ءِ گچین سفری آسراتی فراوان کیک بلکہ واپاری سرجز، زرگزرانی شونداری و مُر انگا علاقہ غاتے بھلا شار تتون گنڈنگ اٹی ہم اہم کڑد ادا کیک۔ او دا ہیت آ زور شاغا کہ شونداری ڈٹ آتا ڈٹ بندی کننگ نا وخت آ کم وختی و مریس مُدی گرج آتے مون آ تخنگ المی ءِ تاکہ وختی گرج آتے پورو کننگ تون اوار آخبت نا خواست آتتون ہم گرنچ مدامگی شونداری ءِ ہم پک کننگ مرے۔ گورنر مندوخیل پارے کہ ننے ڈٹ آتا وخت آ پوروی، تفوئی آب انا چاروکی، شفافیت و دوئی فنڈ آتا جوان کاریم اٹ اتنگ ءِ اولیت تروئی مریک‘ اگہ شونداری ڈٹ آتے جم ڈٹ بندی و اولیت آتے پک کننگ نا رد اٹ بنا کننگے تو نئے بیرہ قومی خزانہ غا سٹی باریم کم مریک بلکہ بجٹ اٹی جتا کروک بھلا بجٹ نا زیان ءِ توننگ و السی وسیلہ غاتیان زیات آن زیات فائدہ ہرفنگ اٹی ہم کمک رسینگک گورنر بلوچستان دا ہیت آ زور شاغا کہ شونداری ڈٹ آتے ٹی السی گرج‘ زرگزرانی افادیت، تفوئی مدامگی و مریس مُدی فائدہ غاتے بنداوی اہمیت تننگے تاکہ ڈٹ آتا پوروی آن پد اوفتا چاروکی کن ہم جوان بست و بند مرے و قومی وسیلہ غان تفوک میرات آتے مدامگی جوڑ کننگ مرے۔