حکومت چیلنج آتتون جوان وڑ اٹ مون تننگ کن کونسل اس ٹہیفینے،سیکرٹری بہبود آبادی ظفر علی بلیدی

کوئٹہ، سیکرٹری بہبود آبادی ظفر علی بلیدی، ڈی جی پیپر پاپولیشن ویلفیئر ڈیپارٹمنٹ غلام مصطفی، یو این ایف پی اے نا سعدیہ عطاء، ڈاکٹر امبرین مینگل، محمد ایوب کاکڑ، جمعہ خان ناصر خان اسک پارینو کہ آبادی ٹی ترندی اٹ مروک آ ودکی نا سوب آن ودی مروک آ چیلنج آتتون گچین وڑاٹ مون تننگ کن حکومت قومی کونسل آبادی اس جوڑ کرینے، ودوک آ آبادی ءِ بیرہ اسہ ویل اس سرپند کننگ نا جاگہ غا تعلیم، چاہنداری و گچین جان جوڑی نا آسراتی نا کمک اٹ قومی شونداری نا طاقت اٹ بدل کننگ وخت انا اہم گرج اسے پاکستان دنیا نا زیات آبادی والا ملک آتیٹی اوار ءِ۔ہراڑے ساڑی مردم شماری نا رداٹ آبادی 24 کروڑ آن گدرینگانے آبادی نا پدریسہ ودکی نا سوب جان جوڑی، تعلیم، روزگار، ہنکین، سفا انگا دیر، ٹرانسپورٹ و ایلو بنداوی آسراتی تا خواست اٹی نمان ودکی مننگ ءِ۔ محکمہ بہبود آبادی حکومت بلوچستان و یو این ایف پی اے ایلو شریدار آتتون اواری اٹ پوسکن برامی تے فیملی پلاننگ نا بابت معلومداری و گڑاتا فراوانی ءِ پک کننگ ءِ و محکمہ بہبود آبادی ورنا برامی تے تروک آسراتی و گڑاتا پورو ڈیٹا ءِ کمپیوٹرائز کننگانے۔ داہیت ءِ او چارشنبے نا دے محکمہ بہبود آبادی حکومت بلوچستان و یو این ایف پی اے نا شریداری اٹ ٹیکنیکل سلابتی دیوان ایف پی 2030ء ورکنگ گروپ نا دیوان آن تران کرسا کریر۔ دیوان اٹ آر ایف پی اے پی نا ریجنل ڈائریکٹر گستاخ احمد، ہینڈز نا پروفیشنل کوآرڈینیٹر داؤد خان، آر آئی زیڈ نا ڈاکٹر نسیم اللہ، پاتھ فائنڈر نا ولی محمد، پی این ڈی نا کامران جمیل، پی ڈبلیو ڈی نا نیاز احمد، عرفان اللہ، ہلتھ ڈیپارٹمنٹ نا ڈاکٹر کامران الہی، ایم این سی ایچ نا ڈاکٹر سبینہ بگٹی، یو این ایف پی اے نا بلاول بلوچ، پی پی ایچ آئی بی نا ڈاکٹر مختار زہری، پی ڈبلیو ڈی نا ڈپٹی ڈائریکٹر حفیفہ، پی ڈبلیو ڈی نا عبداللطیف محمدحسنی و ایلو محکمہ غاتا نمائندہ غاک بشخ ہلکر۔او پاریر کہ پاکستان نا آبادی نا اسہ بھلو بشخ اس ورنا تیا تالان ءِ، پاکستان نا ورنا آبادی ملک انا نہادی میرات پک مننگ کیک شڑت دادے کہ اوفتے آب اٹ تعلیم، تکنیکی ہیلکاری‘ پوسکن چاہنداری‘ گچین طبی آسراتی و شرف اٹ روزگار فراوان کننگے۔