مولانا فضل الرحمن ءِ شیف خلوک آک سوگو ریاست ءِ نزور کننگ خوارہ،یونس عزیز زہری

خضدار، جمعیت علمائے اسلام نا بنجائی راہشون و بلوچستان اسمبلی اٹی اپوزیشن لیڈر میر یونس عزیز زہری پارینے کہ جمعیت علمائے اسلام نا قائد مولانا فضل الرحمن سیاست نا سرکڑدہ ءِ، ملک انا سیاست اٹی اوڑانبار ءُ مدبر، جوانو آزموندہ کار راہشون ساڑی اف۔ مولانا فضل الرحمن ہر تنکی نا ریسہ ٹی ملک انا کمک ءِ کرینے۔ ہراتم ہم ملک اٹی سیاسی تنکی بس، جمہوریت ءِ گڑتیک مون تروک مسر یا آئین ءِ زہمی کننگا‘ مولانا مدام ملک اکن جندی فائدہ غاتے پد بٹسا قومی فائدہ ءِ اولیت تس۔ او پارے کہ اینو مولانا فضل الرحمن آ ہرا ناروا تنقید کننگ انگ ءِ او بھاز گڑتی نا سوب ءِ۔ تنقید کروک آک دا گیرام کیرہ کہ دا ہمو قائد ءِ ہرا ملک اٹی جمہوریت نا بحالی کن کل آن بھلا جہد ءِ کرینے و ہر چیلنج نا مون اٹی سوگو سلوک مسنے‘ مولانا فضل الرحمن مدام مفاہمت و مذاکرات نا سیاست آ پت تخانے۔ او ملک ءِ بے چیٹی آن بچفنگ کن مدام سیاسی واک آتے اسہ میز اسے آ اتنگ نا کوشست کرینے، ہندا سوب ءِ کہ اینو کل سیاسی جماعت آک اونا سیاسی سُج پام ءِ منرہ۔ او پارے کہ نن مسلم لیگ (ن) تون تینا سیاسی غاو ءِ المی تخنہ کہ جمعیت علمائے اسلام ہر تنکی نا وخت اٹی مسلم لیگ (ن) نا بیدس شڑت آ کمک ءِ کرے، اپوزیشن نا سخت انگا دور اٹی ہم نن اوفتا ہم کوپہ سلیسون‘ اوفتا مشکل آتے تینا مشکل سرپند مسن و اوفتیکن آسانی ودی کرین۔ ولے اینو کل آن زیات جموریت ءِ نسخان رسیفنگ اٹی مسلم لیگ (ن) کل آن مون اٹی ءِ و مولانا فضل الرحمن نا راستکی آ تالان موقف اوفتیا کبین مننگ اٹی ءِ۔ اپوزیشن لیڈر میر یونس عزیز زہری پارے کہ مولانا فضل الرحمن نا ہر چار آ صوبہ، گلگت بلتستان و آزاد کشمیر اسکان لکھ آ دوستخوا و کارندہ غاک ساڑی ءُ۔ اونا سیاست علاقائی آخا بلکہ قومی و ملکی سیاست ءِ۔ مولانا فضل الرحمن ہر تنکی نا ریسہ ٹی ملک انا شرف و جمہوری ریسہ نا کمک ءِ کرینے۔ او اسٹ انگا سیاستدان ءِ ہرا ملک ءِ سیاسی بے سوگوی آن کشنگ کن مدام تینا کڑد ءِ ادا کرے و جندی جھیڑہ غاتے قومی فائدہ غاتیا ندر کرے۔ او پارے کہ اینو ملک ءِ ہرا سیاسی حکمت و تدبر نا گرج ءِ او بیرہ مولانا فضل الرحمن تون ساڑی ءِ۔