استاد آتا اسکول آتیٹی حاضری و تدریسی سرجز آتیا سخت چاروکی المی ءِ،فلائٹ لیفٹیننٹ (ر) خالد شمس

برشور، ڈپٹی کمشنر برشور فلائٹ لیفٹیننٹ (ریٹائرڈ) خالد شمس نا کماشی ٹی ڈسٹرکٹ ایجوکیشن گروپ نا اسہ اہم ءُ دیوان اس اڈ ہلک، ہراٹی اسسٹنٹ کمشنر برشور سید رضی ہریرہ، اسسٹنٹ کمشنر توبہ کاکڑی معید جاموٹ و محکمہ تعلیم نا ضلعی افسر آتتون اوار کل ہیڈ کلسٹر آک بشخ ہلکر۔ دیوان نا بنداوی مسخت مچ آ ضلع ٹی سرکاری اسکول آتا جم کارکڑد نا جاچ ءِ ہلنگ‘ استاد آتا حاضری نا جاچ ءِ ہلنگ و تعلیمی ادارہ غاتے مون تروک بنداوی ویل آتا دمدستی ایسری ءِ پٹنگ ئس۔ دیوان آن تران کرسا ڈپٹی کمشنر خالد شمس شفافیت و نظم و ضبط ءِ برجا تخنگ کن کل ہیڈ کلسٹر آتے سخت پرمان جاری کرے کہ او تینا شیفکو ملازم آتا پورو ڈیٹا ءِ دفتر اٹی جمع کرفر و دا ریکارڈ نا محکمہ خزانہ غان باقاعدہ پک کرفر۔ او پیدوار کرے کہ تعلیمی آب ءِ گچین جوڑ کننگ کن استاد آتا حاضری و تدریسی سرجز آتا سخت چاروکی المی ءِ، ہراڑکن ہڑدے ئی بنداو آ اسکول تا دورہ غاتے کننگے۔ او پارے کہ استاد آتا غیر حاضری و زمواری تے ٹی ہچ وڑ انا ڈیوالئی یا سستی ءِ اسُل سگنگ مفک‘ دا وڑ انا بندغ آتا برخلاف سخت کارروائی ہم کننگک۔ ڈپٹی کمشنر اسسٹنٹ کمشنر و ضلعی افسر تیا زور شاغا کہ او تینا دنگ اٹ بروک اسکول آتا باقاعدہ و شیڈولڈ دورہ ءِ کیر تاکہ ضلع نا اسہ اسکول اس ہم غیر فعال سلپ و طالب علم آتا تدریسی عمل بیدس اڑاند آن برجا سلے۔ داکان بیدس او پارت کرے کہ علاقہ ٹی جوڑ نزور حال اسکول آتا دمدستی وڑ اٹ نشاندہی ءِ کننگے تاکہ اوفتا جم رپورٹ ڈی ای او دفتر ءِ فراوان کننگ مرے و اسکول آتا نزور حال ماڑی تا وخت آ جوڑجاڑ و بحالی کرسا چناتیکن اسہ رکھی و گچین تعلیمی چاگڑد اس جوڑ کننگ مرے۔