برآمد کار آتا ویل آتا ایسری کن اوفتے باقاعدہ دستاویزی دروشم تننگے، جام کمال خان

اسلام آباد، بنجائی وزیر واپارجام کمال خان نا کماشی ٹی برآمد کروک‘ صنعت کارو کاروباری برادری نا نمائندہ غاتا سلابتی دیوان اس اڈ ہلک ہراٹی برآمد کروک آتا ویل ٓآتے ایسرکننگ کن، صنعتی گوبرءِ گچین کننگ اور پاکستان نا برآمد آتیٹی ودکی کن حکومتی ارادگی نا درشانی ءِ کننگا۔ چارشنبے نا دے آمروک آ دیوان اٹی بنجائی وزیر بحری باندات محمد جنید انوار چوہدری دیوان اٹی آن لائن بشخ ہلک، وخت اس کہ خزانہ و بنگکاری نا وزیر مملکت بلال اظہر کیانی، وزیراعظم نا واپارو صنعت نا بابت رابطہ کار رانا احسان افضل خان، تعلقدار وزارت آتا سیکرٹری و جتا جتا محکمہ غاتا سینئر کمامدارآک ہم بشخ ہلکر۔ کاروباری برادری نا چندی نمائندہ غاک تینا سلاہ تے پیش کریر۔ وزیر واپارجام کمال خان پاکستان نا برآمد آتیٹی وڑپہ وری ودی کننگ، ویلیو ایڈڈ مصنوعات آتا مون آ دننگ، پوسکن جہانی منڈی تا پٹنگ، برآمد کروک آتے مون تروک اڑاند آتے چٹفنگ، توانائی نا ودوک آ نہاد، ات و در و مال برداری نا خڑچ، خراج و جہانی واپاری حالیت آتیٹی بدلی نا سوب ودی مروک آ ویل آتے کم کننگ نا گرج آ زور شاغا۔ او پارے کہ حکومت تعلقدار وزارت و ضابطہ ئی ادارہ غاتا تین پہ تینی کمکاری آن عملی ایسر اس پٹنگ کن صنعتی بشخ انا نمائندہ غاتتون دراست رابطہ ٹی ءِ۔ وزیر مملکت خزانہ و بنگکاری بلال اظہر کیانی داہیت آ زور شاغا کہ برآمد کروک آتا ویل آتے باقاعدہ دستاویزی دروشم تننگے، تعلقدار محکمہ غاتیان اوفتیا موقف دوئی کننگے و عمل مننگ کروک سلاہ شون تننگے، دیوان اٹی کاروباری برادری نا نمائندہ غاک ایکسپورٹ امپورٹ بینک (ایگزم بینک) نا برآمد کروک آتے کن مون آ اتوک اسکیم نا ستاءِ کرسا اودے برآمدی مالی کمکاری اسکان رسینگ ءِ گچین جوڑ کننگ و جہانی منڈی اسکان ودفنگ نا خواہندار ادارہ غاتا کمکاری کن مثبت گام اس گوندا۔ صنعتی بشخ انا نمائندہ غاک توانائی نا خڑچ، کیپٹو پاور پلانٹ آتے کن گیس لیوی، صوبائی انفراسٹرکچر لیویز و پیداواری خڑچ اٹی ودکی نا بابت گڑتی تے پیش کریر۔