شنگھائی کمکار تنظیم مدامگی اقتصادی ردوم اٹ سرکڑدہ کڑد ادا کننگ کیک،نائب وزیراعظم اسحاق ڈار

دوشنبے، نائب وزیراعظم اسحاق ڈار پارینے کہ شنگھائی کمکار تنظیم ڈیجیٹل بدلی و مدامگی اقتصادی ردوم اٹ سرکڑدہ کڑد ادا کننگ کیک، کشت وکشار‘ کان کنی، معدنیات و آئی ٹی نا بشخ آتیٹی زرکاری ودفنگ نا مخ تفی ءِ کینہ۔ شنگھائی کمکار تنظیم نا دیوان آن تران کرسا نائب وزیراعظم اسحاق ڈار پارے کہ سی پیک ایس سی او شریدار آتے زرگزرانی اواری نا اسیجائی سفر اٹی ترندی اتنگ نا وارخواہی فراوان کیک، توانائی ٹی کمکاری و جہانی معلوماتی سلامتی بایدے ایس سی او نا اہم بشخ مرے‘ نائب وزیراعظم پارے کہ وزیراعظم محمد شہباز شریف شنگھائی کمکار تنظیم نا پاکستان کماشی نا وژن ءِ پیش کرے، شنگھائی کمکار تنظیم تین پہ تینی پت‘ و ہر اسٹ نا شرف انا اصول آتیا سلوک ءِ، ڈیہہ اٹی رابطہ غاتا شون تننگ کن ایس سی او تون اوار مرسا کاریم کینہ۔ اسحاق ڈار پارے کہ شنگھائی کمکار تنظیم نا ایجنڈا غا عملدرآمد کن سنبرینگوک اُن، ایس سی او نا ڈیہہ جہانی اقتصادی شونداری نا بنجا جوڑ مننگ نا لائخی تخک، شنگھائی کمکار تنظیم واپاری‘ بنداوی پنجر، دود ربیدہ و پوسکنوڑی نا بشخ اسکان تینا کاریمی دنگ ءِ ودفینے۔او پارے کہ پاکستان نا شنگھائی کمکار تنظیم اٹی اواری شنگھائی اسپرٹ تون ننا گنڈوک مننگ نا درشانی ءِ‘ توانائی و ٹرانسپورٹ نا بشخ آتیٹی ہدف زرکاری زرگزرانی اواری کن اہم ءِ۔