چشمہ پول انا تفوئی کاریم اٹ پین ترندی اتنگے، ڈیوالئی سگنگ پک، میر سلیم کھوسہ

کوئٹہ، صوبائی وزیر مواصلات و تعمیرات میر سلیم احمد کھوسہ پارت کرینے کہ چشمہ پول انا تفوئی کاریم اٹی پین ترندی اتنگے تاکہ علاقہ نا الس ءِ مون تروک آ مشکل آتا زوت آن زوت چٹفنگ ءِ پک کننگ مرے۔ او پیدوار کرے کہ پول انا تفوئی کاریم اٹ آب و مٹیریل نا کاریم اٹ اتنگ نا بابت ہچ ءُ سمجھوتہ اس کننگپک و تعلقدار کمامدار آک دا ڈٹ انا وخت آ و آب اٹ پوروی ءِ پک کیر۔ دا خیال آتا درشانی ءِ او کوئٹہ شار اٹی برجا چندی شونداری ڈٹ، ہرافتے ٹی چمن پھاٹک آن کوئلہ پھاٹک فیز ٹو و پوسکن تفوک چشمہ پول اوار ءُ، دورہ نا وخت آ کرے ہراڑے او تفوئی کاریم نا سرجم جاچ ءِ ہلک و ڈٹ انا پیش رفت، پوروی نا ریسہ و مون تروک ویل آتا بابت تعلقدار کمامدار آتیان بریفنگ ہلک۔ داوخت آ سیکرٹری مواصلات و تعمیرات بابر خان، چیف انجینئر کوئٹہ زون عبدالرحیم بنگلزئی، چیف انجینئر فیڈرل پروجیکٹس ڈاکٹر سجاد بلوچ، سپرنٹنڈنگ انجینئر کوئٹہ محمد وسیم حیدر، ایگزیکٹو انجینئر روڈز کچلاک زون قاضی ثناء اللہ تون اوار ایلو تعلقدار افسر آک ہم ساڑی ئسر۔ دورہ نا وخت آ سیکرٹری مواصلات و تعمیرات بابر خان صوبائی وزیر ءِ ڈٹ انا ساڑی حالیت آن معلومدار کرسا پارے کہ ہندی آبادی تون تعلقدار باندات و منہ تکنیکی ویل آتا سوب آن تفوئی کاریم اٹی ہُرے مننگ اٹی ءِ ولے دا ویل آتے اولیتی بنداو آ ایسر کننگانے۔ او پارے کہ پول انا تفنگ نا کاریم پدریسہ برجاءِ و اودے زوت آن زوت پوروی اسکان رسیفنگ کن کل دوئی وسیلہ غاتے کاریم اٹ اتنگ انگ ءِ‘۔ صوبائی وزیر میر سلیم احمد کھوسہ پارے کہ چشمہ پول انا تفنگ علاقہ نا الس نا بھلا ویل ءِ ایسر کننگ اٹی اہم کڑد ادا کیک‘ پول انا پورو مننگ آن نئے بیرہ ہندی آبادی ءِ ہن و بر نا مشکل آتیان خلاسی رسینگک بلکہ دا کسر آن گدرینگوک مسافر آتے ہم آسراتی دوئی مریک۔ او پارے کہ الس ءِ گچین سفری آسراتی تا فراوانی و اوفتا مشکل آتے ایسر کننگ حکومت نا اولیت آتیٹی اوار ءِ۔ او تعلقدار افسر آتے پارت کرے کہ تفوئی کاریم نا رفتار ءِ پین ترند کننگے و دسمبر اسکان دا ڈٹ ءِ امر کہ مرے پورو کننگے و ڈٹ انا وخت آ پوروی کن گچین گام گیج کننگے۔ صوبائی وزیر مواصلات و تعمیرات دا ہیت آ ہم زور شاغا کہ تفوئی مٹیریل نا آب‘ فنی خواست و پک آب انا تفنگ آ خصوصی چکار کننگے تاکہ پول مدامگی، رکھ و بھلو وخت اسسکان الس کن کاریم اٹ اتنگ نا لائخ مننگ کے۔