خراج پالیسی ءِ زرگزرانی سرجز و خواست آتتون ہم گرنچ کننگ المی،سینیٹر محمد اورنگزیب

اسلام آباد، بنجائی وزیر خزانہ و بنگکاری سینیٹر محمد اورنگزیب پارینے کہ خراج پالیسی ءِ بیرہ مالیاتی ہدف آتے پورو کننگ نا جاگہ غازرگزرانی سرجزو قدر اٹی ودکی نا خواست آتتون ہم گرنچ کننگ المی ءِ۔ مالیاتی نسخان 22 سال انا کم انگا کچ آ بسنے، پدریسہ مسہ سال بنداوی بجٹ سرپلس دوئی کننگا، بنگ آتیٹی 40 درسد ودکی مس، جی ڈی پی نا کچ اٹ خراج آتا کچ 8.8 درسد آن ودسا 10.3 درسد مسنے۔ او دا ہیت ءِ سے شنبے نا دے وزارت خزانہ نا کنڈآن خراج نظام اٹی اصلاحات نا بابت اڈ تروک ورکشاپ آن تران کرسا پارے۔ وزیر خزانہ پارے کہ پاکستان زرگزرانی سوگوی نا ریسہ غاتیان مون آ ہنسا مدامگی و و برآمد آتیا تالان ردوم نا کنڈ آ ہِننگ ءِ، مستین اٹی وام و نسخان آ تالان شونداری نا آزموندہ غاتا سوب آن زرگزران ءِ بھاز و سست روی نا دور آتون مون تروئی تما، ولے حکومت دا وڑ انا آزموندہ غاتے دُوارہ کننگ کن اِلیپک۔ او پارے کہ تدوک آ اِرٹ آن مسہ سال اٹی خراج ٹو جی ڈی پی کچ اٹی 1.5 درسد پوائنٹ آتا ودکی مس ہراٹی 0.9 درسد پوائنٹس گچینی خراج کانود آتیا عملدرآمد، خراج دُزی و بنگ آتا زیان نا توننگ وخت اس کہ 0.6 درسد پوائنٹ ودکی پوسکن آ پالیسی گام گیج آتا سوب آن مس، آخبت اٹ خراج کانود آتیاگچین عملدرآمد تون خراج نیٹ ءِ ودفنگ آ ہم چکار کننگک۔ سینیٹر محمد اورنگزیب پارے کہ فیڈرل بورڈ آف ریونیو نا ٹرانسفرمیشن پروگرام اٹی ہیومن ریسورس‘ وڑوڈول و ٹیکنالوجی ءِ گچین کننگ انگ ءِ ہرا نا کماشی ءِ وزیر اعظم تینٹ کننگ ءِ و دانا پیشرفت نا ہفتہ وار جاچ ءِ ہلنگک، خراج اصلاحات تون توانائی نا بشخ، سرکاری ملکیتی ادارہ، پراؤیٹائزیشن‘ سرکاری مالیات، پنشن و ٹیرف نا بشخ آتیٹی اصلاحات ہم حکومت نا اہم ایجنڈا نا بشخ ءِ، دا اصلاحات آتا مسخت بنگ آتیٹی ودکی تون زرگزرانی سوگوی و مدامگی شونداری نا بنداو ءِ سوگو کننگ ءِ۔