زرکار آک السی آسودہی کن کڑد ادا کیرہ‘یاسر اقبال دشتی

تربت، ڈپٹی کمشنر کیچ یاسر اقبال دشتی نا کماشی ٹی بوتل بند دیر انا فیکٹری تا مالک آتا اہم ءُ دیوان اس اڈ ہلک، ہراٹی اسسٹنٹ کمشنر تربت، اسسٹنٹ کمشنر بلیدہ و بوتل بند دیر انا فیکٹری تا مالک آک بشخ ہلکر۔ دیوان اٹی ضلع کیچ اٹی السی آسراتی تا گچینی‘ کارپوریٹ راجی زمواری نا رد اٹ آسودہی گام گیج، السی فائدہ نا ڈٹ و ضلعی انتظامیہ تون پرائیویٹ بشخ انا کمکاری تون اوار جتا جتا باندات آتیا جم گپ وتران کننگا۔ داوخت آ ڈپٹی کمشنر کیچ یاسر اقبال دشتی پارے کہ پرائیویٹ بشخ راج نا شونداری و السی آسودہی ٹی اہم و بھرمی کڑد ادا کننگ کیک۔ او بوتل بند دیر انا فیکٹری تا مالک آتیا زور شاغا کہ او کارپوریٹ راجی زمواری نا رد اٹ ضلعی انتظامیہ تون پورو کمک کیر و السی فائدہ نا ڈٹ آتیٹی تینا بھرمی کڑد ءِ ادا کیر۔