محکمہ سوشل ویلفیئر محروم و نزور تپہ غاتے آسراتی فراوان کننگ ءِ،میر سیف اللہ خان کھیتران

کوئٹہ، ڈائریکٹر جنرل سوشل ویلفیئر بلوچستان میر سیف اللہ خان کھیتران پارینے کہ وزیراعلیٰ بلوچستان میر سرفراز بگٹی نا پارت آ محکمہ سوشل ویلفیئر راج نا نزور، حقدار ونیم جان بندغ آتا آسودہی‘ اوفتے راج انا فعال بشخ جوڑ کننگ و اوفتا حق آتا رکھ اکن بھرمی گام گیج کننگ اٹی ءِ۔ ڈی جی میر سیف اللہ کھیتران پارے کہ صوبہ ٹی راجی آسودہی نا پروگرام آتے پین منظم و بھرمی جوڑ کننگ تون اوار حقدار بندغ اسکان سرکاری آسراتی تا رسینگ ءِ پک کننگ آ خاص چکار تننگ انگ ءِ‘ او پارے کہ محکمہ سوشل ویلفیئر نا بنداوی مسخت راج انا محروم و نزور تپہ غاتے آسراتی فراوان کننگ، اوفتا مشکل آتے چٹفنگ و اوفتے شرف اٹ زند گدریفنگ نا وارخواہی فراوان کننگ ءِ‘ دا رد اٹ نیم جان بندغ، زالبول، چنا، پیر انگا شاری، چوری و ایلو حقدار تپہ غاتیکن جتا جتا جتا فلاحی گام گیج آک برجا ءُ۔ میر سیف اللہ خان کھیتران پارے کہ نیم جان بندغ آتا بحالی و اوفتے راج اٹی شرف اٹ ہند ترفنگ محکمہ سوشل ویلفیئر نا اہم اولیت آتیٹی اوار ءِ نیم جان بندغ آتے کمکی ازباب آتا فراوانی، بحالی، تعلیم و روزگار نا وارخواہی تا دوئی اسکان رسینگ کن جتا پروگرام آتیا کاریم کننگ انگ ءِ تاکہ او تینا لائخی تے کاریم اٹ اتسا تینا سیبو اٹ زند گدریفنگ کیر۔ او پارے کہ راج اٹی ساڑی پٹنگ نا چٹفنگ و پنڈوک بندغ آتا بحالی کن ہم محکمہ سوشل ویلفیئر تعلقدار ادارہ غاتا کمک اٹ گام گیج کننگ اٹی ءِ‘ پنڈنگ نا ویل انا ایسری کن بیرہ کارروائی بھاز اف بلکہ دُن انگا بندغ آتا راجی و زرگزرانی بحالی ہم المی ءِ تاکہ اوفتے شرف اٹ روزگار و زند انا گچین وارخواہی فراوان کننگ مرے۔ ڈی جی سوشل ویلفیئر پارے کہ زالبول و چناتا آسودہی ہم محکمہ نا اولیت آتیٹی اوار ءِ۔ زالبول آتے واکدار جوڑ کننگ، اوفتے ہنر ہیل تننگ و زرگزرانی وڑ اٹ سوگو کننگ کن جتا جتا ڈٹ آتیا عملدرآمد کننگ انگ ءِ‘ وخت اس کہ چناتا رکھ، تعلیم و گچین آخبت کن ہم تعلقدار ادارہ غاتتون اوار مرسا گام گیج کننگ انگ ءِ‘ او پارے کہ محکمہ سوشل ویلفیئر ناکنڈآن آسودہی ادارہ و راجی تنظیم تتون رابطہ کاری ءِ ہم پین بھرمی جوڑ کننگ انگ ءِ تاکہ ساڑی وسیلہ غاتے گچین وڑ اٹ کاریم اٹ اتسا زیات آن زیات حقدار بندغ آتسکان کمک و آسراتی تے سر کننگ مرے۔ میر سیف اللہ خان کھیتران پارے کہ بلوچستان اسہ بھلو و تالان ءُ صوبہ اسے ہراڑے مر انگا علاقہ غاتیٹی رہینگوک حقدار بندغ آتے راجی آسودہی نا آسراتی تا فراوانی اسہ اہم ءُ زمواری اسے۔ محکمہ نا کوشست ءِ کہ ضلعی کہول آ سوشل ویلفیئر نا سرجز آتے فعال جوڑ کننگے و الس ءِ اوفتا علاقہ غاتیٹی گمانی آسراتیک فراوان کننگر۔