پردیسی پاکستانی تے ہر آسراتی فراوان کننگ خوانہ، اعظم نذیر تارڑ

اسلام آباد، بنجائی وزیر کانود اعظم نذیر تارڑ پارینے کہ پردیسی پاکستانی تے ہر آسراتی تے فراوان کننگ کن حکومت سنبرینگوک ءِ‘ و المی کاغد آتا پک کننگ کن جوان نظام، ریکارڈ نا پک کننگ نا کاریم ءِ ترند و آسان کننگ نا پارت کرینے۔بنجائی وزیر کانود اعظم نذیر تارڑ نا کماشی ٹی پاسپورٹ رولز کمیٹی نا دیوان اڈ ہلک۔ دیوان اٹی وزارت داخلہ، وزارت خارجہ، محکمہ پاسپورٹ و تعلقدار کمامدار آک بشخ ہلکر۔ وزیر کانود اعظم نذیر تارڑ پارے کہ پیشن ملک آتے ٹی رہینگوک پاکستانیک ننا نہادی مڈی ءُ، پردیسی تے ہر وڑانا آسراتی فراوان کننگ کن حکومت سنبرینگوک ءِ۔ اعظم نذیر تارڑ پارے کہ سفر نا کاغد و المی کاغد آتا وخت آ پک کننگ ءِ المی جوڑ کننگے۔