کیہی اسلامی ملک آک مکہ اسیجائی معاہدہ ٹی اوار مننگ نا خواہندار ءُ،خواجہ آصف

اسلام آباد، وزیرِ دفاع خواجہ محمد آصف پارینے کہ کیہی اسلامی ملک آک مکہ معاہدہ نا بشخ جوڑ مننگ نا خواہندار ءُ، اوفتا کنڈ آن شڑت و ضابطہ غاتے پک کننگ انگ ءِ۔ صحافی تتون ہیت وگپ کرسا او پارے کہ استنبول دیوان اٹی ہر مسٹ آ ملک آتا نمائندہ غاتے دا زمواری تننگاسس کہ مکہ دفاعی معاہدہ ءِ عملی دروشم تننگ کن کاریم نا بنا کننگے۔دیوان اٹی معاہدہ نا تنظیمی پنجر آ جم گپ وتران مس۔ ہراٹی معاہدہ نا سیکرٹریٹ نا ہند، عہدیدار، ممبر آتا مد، پوسکن آ باسک آتا معاہدہ ٹی اواری تون اوار ایلو باندات آتیا جم گپ وتران کننگا۔ او پارے کہ ایلو ایلم اسلامی ملک آک ہم دا معاہدہ نا بشخ جوڑ مننگ خوارہ۔ دیوان اٹی دا ملک آتا کنڈ آن شڑت و ضابطہ غاتیا ہم گپ وتران مس کہ اخس وخت آن پد پوسکن آ ممبر آتے دا معاہدہ ٹی اوار کننگ کن کسر تے ملنگے۔ باسک آ کچ اخس مرے؟ ہرا شڑت آتیا اوفتے دا معاہدہ نا بشخ جوڑ کننگے؟ دا کل باندات آتیا داسہ بیرہ گپ وتران مسنے، پک فیصلہ غاتے تو سرکڑدہ غاک کیرہ۔ نن تو بیرہ فریق آتا کنڈ آن اسہ کمیٹی اسے اُن۔ او پارے کہ دا انتظامی باندات آتیا بروک آ وخت اٹی پین گپ وتران کننگک۔ داسہ بروک آ تُو انا بنا ٹی پین اسہ دیوان اس مریک‘ ہراٹی دا ہننگک کہ تدوک آ دیوان اٹی جم سجفوک باندات آتیا اخس کاریم مسنے و مونی انت کروئی ءِ۔ او پارے کہ انتظامی پنجر آ پک گپ وتران آن پد باندات ایپکس کمیٹی ءِ تننگک و اوکان پد دا فورم آن باندات پین مونی کاہک۔ اسہ سوج اسے نا ورندی ٹی او ہرمسٹ آ فریق آتا بروک آ دیوان نا پاکستان اٹی مننگ نا گمان درشان کرے ولے پارے کہ داسکان دابابت پک وڑاٹ ہچ پاننگ مفک۔