دہشت گردی نا واقعہ غاتیٹی شہید مروک آتا قربانی تے مدام یات تخنگک،اسپیکر قومی اسمبلی

اسپیکر قومی اسمبلی سردار ایاز صادق پارینے کہ دہشت گردی انسانیت نا برخلاف اسہ بھلو ُ ڈوہ و جہانی امن و سلامتی کن اسہ بھلو خطرہ اسے، دہشت گردی نا واقعہ غاتیٹی شہید مروک آ کودک شاری، سیکورٹی فورس و کانود نافذ کروک آ ادارہ غاتا بہادر کارندہ غاتا قربانی تے مدام یات تخنگک۔ جمعہ نا دے آدہشت گردی نا زہمی تا یات انا جہانی دے انا وخت آ تینا کلہو اٹ او پارینے کہ پاکستان گدرینگوک آ کیہی دہائی تیان دہشت گردی نا ناچوڑ نا برخلاف جنگ کننگءِ و دا جنگ اٹ مچ آ قوم بے کچ قربانی تسنے۔ او پارینے کہ دہشت گردی نا برخلاف جنگ اٹ شہید مروک آ ننا بہادر ورنا و کودک شاری تا قربانی قومی تاریخ نا روشنا بشخ ءُ۔ او پارینے کہ شہید آتا قربانیک زیان مفسہ وقوم تینا شہید و اوفتا خاہوت آتے مدام قدر و شرف نا نظر اٹ ہرک۔ اسپیکر قومی اسمبلی پارے کہ پاکستان نا سیکورٹی فورس و کانود نافذ کروک آ ادارہ غاک دہشت گردی نا برخلاف فرنٹ لائن آ بہادری و کسبی لائخی تون تینا کڑد ءِ ادا کننگ ءُ۔ او پارے کہ مچ آ قوم تینا بہادر سیکورٹی فورس آتتون ہم کوپہ سلوک ءِ و ملک انا دفاع، امن و سلامتی کن اوفتا قربانی مچ آ قوم اکن گمرنا سوب ءُ۔ سردار ایاز صادق پارے کہ بھارتی کاٹم خواجہی ٹی کاریم کروک فتنہ الخوارج و فتنہ الہندوستان پاکستان نا امن، سلامتی و سوگوی ءِ نسخان تننگ نا پراگندہ ارادہ تخرہ۔ او پارے کہ دہشت گرد زموارآک کودک شاری تے شست کرسا ملک اٹ خلیس و بھیم تالان کننگ و پاکستان نا امن و سوگوی ءِ نسخان تننگ خوارہ، ولے او تینا پراگندہ ارادہ غاتیٹی اسُل سرسہب مفسہ۔ او پارے کہ پاکستان نا برخلاف ہر سازش و ملک اٹ بدامنی ودی کننگ نا ہر کوشست ءِ قوم و ریاستی ادارہ غاک اواری اٹ بے سہب کیرہ۔ اسپیکر قومی اسمبلی پارے کہ دہشت گردی نا برخلاف جنگ اٹ قومی سیوت و ریاستی ادارہ غاتا نیام اٹ گچین کمکاری وخت انا اہم ءُ گرج اسے۔ او پارے کہ دہشت گرد و اوفتا کمکارآتا برخلاف بے فرق کارروائی برجا سلک و ملک انا امن و سوگوی ءِ نسخان تروک آتے ہچ وڑ اٹ سرسہب مننگ کن ہلنگ پننگک۔ او پارے کہ دہشت گردی نا پورو چٹفنگ کن قومی عزم ءِ پین سوگو کننگ نا گرج ءِ۔ سردار ایاز صادق پارے کہ آپریشن عزم استحکام نا رداٹ سیکورٹی فورس آک دہشت گرد زموارآتا برخلاف کارروائی تے برجا تخانو۔