سیمہ ٹی 19 حقدار بندغ ءِ روزگار کننگ کن گڑاک تننگار،بی آر ایس پی رائز پراجیکٹ

بلوچستان رورل سپورٹ پروگرام (BRSP) نا RISE پراجیکٹ نا رِداٹ تحصیل آفس بسیمہ، ضلع واشک اٹی اسہ اہم ءُ دود اس اڈ ہلک، ہراٹی 19 حقدار‘ غریب و ضرورت رج مند بندغ آتیٹی روزگار نا وارخواہی ودی کننگ کن جتا جتا گرانٹ جنریٹنگ انکمز (IGGs) نا رِداٹ المی گڑا بشخ و پانٹ کننگا۔ دا گام انا مسخت حقدار خاہوت آتے شرفمند روزگار نا وارخواہی فراوان کرسا اوفتے زرگزرانی وڑ اٹ تینا نت تیا سلفنگ و اوفتا اُرائی حالیت آتیٹی گچینی اتنگ ءِ‘ داوخت آ تحصیل آفس بسیمہ نا آفس انچارج خالد ایاز و بی آر ایس پی نا ٹیم حقدار آتیٹی نت انا چکی سلائی مشین، سولر سسٹم و بیٹری فراوان کریر۔ فراوان کروک گڑا تیان حقدار بندغ آک تینا اُرا تیٹی یا ہندی کہول آ چنکا پوریاگ نابناءِ کرسا آخبتی وڑ اٹ کٹیا دوئی کننگ کیرہ۔ خالد ایاز نا چاروکی ٹی حقدار آتسکان کمک نا شفاف و بھرمی فراوانی ءِ السی کہول آ ستا کڑزک گوندنگانے۔ ہندی سرکڑدہ، حقدار و راجی تپہ غاک تحصیل آفس بسیمہ نا آفس انچارج خالد ایاز نا کوشست آتاستاءِ کرسا پاریر کہ حقدار بندغ آتسکان روزگار نا گڑا تا فراوانی اسہ مثبت و ستا کڑزوک گام اسے۔ اوفک پاریر کہ دا وڑ انا ڈٹ آتا سرسہبی اٹی تعلقدار کارندہ غاتا زموارانہ چاروکی، حقدار آتا نشاندہی و گڑا تا جوان بشخ و پانٹ بنداوی اہمیت تخک۔ راجی تپہ غاتا رِداٹ خالد ایاز و بی آر ایس پی ٹیم انا کنڈ آن حقدار بندغ آتا روزگار نا وارخواہی ودی کننگ نا کوشست آک ستا کڑزرہ۔ ضرورت مند خاہوت آتے بیرہ وختی کمک فراوان کننگ نا جاگہ غا اوفتے روزگار نا وسیلہ غاتے تننگ اسہ ہندن ءُ گام اسے ہرا مریس وختی بنداو آ غریبی ٹی کمتی و زرگزرانی وتواجہی نا شون تننگ اٹ کمک فراوان کیک۔ حقدار آک ہم بی آر ایس پی و تحصیل آفس بسیمہ نا ٹیم انا منت واری ءِ ہرفسا پاریر کہ اوفتے تننگوک گڑاک بیرہ مالی کمک آخا بلکن اوفتا خاہوت آتا جوان آخبت کن اسہ پوسکن ءُ روزگار اسے نا وسیلہ مریرہ۔ بی آر ایس پی نا رِداٹ رائز پراجیکٹ زرگزرانی نت تیا سلفنگ نا کنڈ آ اہم ءُ گام اسے، حقدار آک دا کمکاری نا ستا ءِ کریر۔ بلوچستان رورل سپورٹ پروگرام نا کنڈ آن رائز پراجیکٹ نا رد اٹ راج انا نزور و ضرورت تپہ ءِ روزگار نا وسیلہ فراوان کننگ اسہ ستاکڑزوک فلاحی گام اس گوندنگ انگ ءِ۔ دا ڈٹ انا کمک اٹ حقدار بندغ آتے ہمو گڑاک فراوان کننگ انگ ءُ ہرافتے کاریم اٹ اتسا او تینا لائخی و خواری نا کمک اٹ کٹیا دوئی کننگ کیرہ۔ بی آر ایس پی نا نمائندہ غاتا رِداٹ دا گام گیج آتا بنداوی مسخت حقدار خاہوت آتے زرگزرانی وڑ اٹ سوگو کننگ، اوفتا روزگار نا پوسکن وارخواہی ودی کننگ و اوفتے ایلو تیا سیبو کننگ نا جاگہ غا تینا نت تیا سلفنگ نا لائخ جوڑ کننگ ءِ۔ نت انا چکی، سلائی مشین و سولر سسٹم کون آ گڑاک ہندی گرج آتے و حقدار آتا زرگزرانی سرجز آتے مون آ تخسا فراوان کننگانو۔ ہندی راجی تپہ غاک بی آر ایس پی نا کارکڑد نا ستا ءِ کرسا پاریر کہ ضلع واشک و خاص وڑ اٹ بسیمہ کون آ علاقہ غاتیٹی دا فلاحی و زرگزرانی ڈٹ آتا سخت گرج ءِ‘ ہراڑے کچ اٹنگا روزگار نا وارخواہی تا سوب آن غریب و کم کٹیا کروک خاہوت آک سخت خواری تا گواچی ءُ۔ اوفک پاریر کہ بی آر ایس پی نا رِداٹ رائز پراجیکٹ حقدار خاہوت آتے شرفمند روزگار نا فراوانی نا بابت اسہ جوان ءُ درور اسے۔ حقدار آک دا اومیت نا درشانی ءِ کریر کہ بی آر ایس پی آخبت اٹی ہم بسیمہ و ضلع واشک نا ایلو علاقہ غاتیٹی دا ڈٹ آتا دنگ ءِ پین ودفک تاکہ پین غریب و ضرورت مند خاہوت آتے روزگار نا وسیلہ فراوان کننگ مرے۔ اوفک بی آر ایس پی نا انتظامیہ، رائز پراجیکٹ و خاص وڑ اٹ تحصیل آفس بسیمہ نا آفس انچارج خالد ایاز و اونا ٹیم انا منتواری ءِ ہرفسا پاریر کہ دا وڑ انا گام گیج آک حقی وڑاٹ السی فلاح، زرگزرانی سوگوی و تینا نت تیا سلفنگ نا بنداو ءِ سوگو کیرہ۔ بسیمہ (نامہ نگار)