لمہ نا پال/ پوسکن ودی مروک چنا تے کن قدرتی، رکھوک و پورو غذا سے،ڈاکٹر عبدالرحمان شیرانی

میر گل خان نصیر ٹیچنگ ہسپتال نوشکے نا یو این ایف پی اے ہال اٹی جانجوڑی محکمہ و نیوٹریشن پروگرام نا کنڈآن لمہ نا پال/ نا اہمیت و فائدہ نا بابت سُج پام سیمینار اس اڈ ہلک، ہراٹی جانجوڑی محکمہ نا افسر، سیاسی و راجی راہشون، عالم دین‘ میڈیا نمائندہ، لیڈی ہیلتھ ورکر و زالبول آک بھلو کچ اسے ٹی بشخ ہلکر۔ سیمینار آن ڈسٹرکٹ ہیلتھ آفیسر ڈاکٹر عبدالرحمان شیرانی، ڈپٹی ڈسٹرکٹ ہیلتھ آفیسر ڈاکٹر مشتاق مینگل، نیوٹریشن پروگرام نا افسر احتشام مینگل، پی پی ایچ آئی نا سپورٹ مینیجر ریاض احمد بلوچ، نیشنل ہیلتھ پروگرام نا راہشون رازق زہری، نوشکے پریس کلب نا جنرل سیکرٹری سعید بلوچ، سیاسی راہشون نذیر بلوچ، جمعیت علماء اسلام نا ترجمان مولانا ذکریا عادل و ڈی ایس ای او ظہور احمد تران کریر۔ ڈی ایچ او ڈاکٹر عبدالرحمان شیرانی تران کرسا پارے کہ لمہ نا پال/ پوسکن ودی مروک چنا کن قدرتی، رکھوک و پورو غذا اسے ہرا چنا نا جانجوڑ ردوم (نشوونما)، قوتِ مدافعت و ناجوڑی تیان رکھ اٹی اہم کڑد ادا کیک۔ او پارے کہ چنا نا ودی مننگ آن دمدستی پد لمہ نا پال/ کنفنگ نا بنا کننگ و بنائی شش تُو اسکان چنا ءِ بیرہ لمہ نا پال/ تننگ بھاز المی ءِ۔ او پارے کہ گڑاس لمہ غاک جتا جتا راجی‘ زرگزرانی و ایلو سوب آتیان چناتے تینا پال/ کنفنگ نا جاگہ غا ڈبہ نا پال/ کاریم اٹ اتیرہ، حالانکہ لمہ نا پال/ نئے بیرہ چنا کن زیات کڑزوک غذا اسے بلکن داڑان خاہوت نا ودکی خڑچ آتیٹی ہم کمتی بریک۔ ترانکار آک پاریر کہ لمہ نا پال/ چناتے جتا جتا ناجوڑی و انفیکشن آن بچفنگ، جونی و ذہنی ردوم ءِ گچین کننگ و جانجوڑ زند انا بنداو تخنگ اٹی اہم کڑد ادا کیک۔ داکان بیدس بیدس لمہ نا پال/ کنفنگ آن لمہ و چنا نا نیام اٹی جذباتی مہر و تعلقداری پین سوگو مریک۔ او پارے کہ لمہ نا پال/ انا اہمیت نا بابت راج اٹی ساڑی غلط فہمی تے چٹفنگ و السی پام اٹی ودکی کن عالم دین‘ میڈیا، سیاسی و راجی تنظیم، جانجوڑی محکمہ، لیڈی ہیلتھ ورکر و راج انا کل تپہ غا تے تینا کڑد ادا کروئی تمک۔ ترانکار آک پاریر کہ پوسکن ودی مروک آ چناتے جانجوڑ آخبت فراوان کننگ بیرہ لمہ باوہ غاتا آخا بلکن مچ آ راج نا اسیجائی زمواری ءِ۔ دا مسخت کن لمہ نا پال/ انا فائدہ و چناتے پال/ کنفنگ نا سہی کسر نا بابت پدریسہ سُج پام مہم المی ءُ۔ سیمینار نا وخت آ تلاوتِ کلامِ پاک نا بختاوری ءِ محمد یوسف بلوچ دوئی کرے، وخت اس کہ اسٹیج سیکرٹری نا زمواری تے شافیہ سرتس۔ سیمینار نا اخیر اٹ لمہ نا پال/ انا اہمیت نا بابت سُج پام ریلی اڈ تننگا‘ ہراٹی نیشنل ہیلتھ پروگرام تون تعلقدار لیڈی ہیلتھ ورکر، زالبول و ایلو بندغ آک بھلو کچ اسے ٹی بشخ ہلکر۔ ریلی نا شریدار آک لمہ نا پال/ انا اہمیت ءِ پیدوار کننگ و چنا تا جانجوڑی و گچین ردوم کن السی پام بیدار کننگ نا عزم انا درشانی ءِ کریر۔ نوشکے (نمائندہ تلار)