بلوچستان اٹ امن، شونداری و السی آسودہی آ چکار کننگ نا گرج ءِ،صدر مملکت آصف علی زرداری

اسلام آباد، صدر مملکت آصف علی زرداری تون وزیراعلیٰ بلوچستان میر سرفراز بگٹی ایوانِ صدر اٹی اوڑدہی کرے، ہراٹی بلوچستان نا جم سیاسی، انتظامی و امن ایمنی نا حالیت آتتون اوار صوبہ ٹی برجا شونداری ڈٹ و السی آسودہی نا گام گیج آتیا خوڑتی اٹ گپ وتران کننگا۔ وزیراعلیٰ بلوچستان میر سرفراز بگٹی صدر مملکت ءِ صوبہ ٹی برجا شونداری ڈٹ، السی شونہالی نا گام گیج و امن وایمنی نا حالیت آتیان معلومدار کرے۔ اوڑدہی ٹی بلوچستان نا شونداری، شونہالی و الس ءِ بنداوی آسراتی تا فراوانی کن بنجا و صوبہ نا نیام اٹی بھرمی رابطہ و کمکاری ءِ پین سوگو کننگ آ ہم زور شاغنگا۔ صدر مملکت آصف علی زرداری پارے کہ بلوچستان اٹی مدامگی امن، شونداری و السی شونہالی کن بنجائی و صوبائی حکومت آتا نیام اٹی بھرمی رابطہ و تین پہ تینی کمکاری المی ءِ۔ او پارے کہ ڈغار کچ انا رِداٹ پاکستان نا کل آن بھلا صوبہ بلوچستان ءِ اونا گرج و واکداری نا رِداٹ خصوصی چکار و وسیلہ غاتا فراوانی ءِ پک کروئی تمک۔ صدر مملکت بلوچستان اٹی امن و شونداری کن صوبائی حکومت نا کوشست آتا ستاءِ کرسا پارے کہ بنجائی حکومت بلوچستان نا شونداری نا سفر اٹی صوبائی حکومت تون ہر وڑ انا کمکاری ءِ برجا تخک۔ وزیراعلیٰ میر سرفراز بگٹی صدر مملکت نا منت واری ءِ ہرفسا پارے کہ بلوچستان اٹی امن، شونداری و السی شونہالی کن بنجائی حکومت نا کمکاری صوبائی حکومت کن بے کچ اہم ءِ۔ او پارے کہ صوبائی حکومت امن‘ شونداری عمل اٹی ترندی، ورناتے وارخواہی تا فراوانی و الس ءِ بنداوی آسراتی تا فراوانی کن گچین سج پام نا رِداٹ گام گیج کننگ اٹی ءِ۔ وزیراعلیٰ بلوچستان پارے کہ بلوچستان نا شونداری ءِ امن تون گنڈسا ہننگ انگ ءِ و صوبائی حکومت نا ارادہ ءِ کہ الس ءِ شونداری نا فائدہ غاتے اوفتا درگہ غا سر کننگے۔ او پارے کہ حکومت بلوچستان دہشت گردی نا برخلاف جنگ اٹی کانود نافذ کروک ادارہ غاتتون پورو کمکاری کرسا الس نا جان و مال انا رکھ ءِ امر کہ مرے پک کیک۔ صدر آصف علی زرداری پارے کہ پیشن نا کاٹم خواجہی ٹی کاریم کروک دہشت گرد آک بلوچستان نا شونداری نا کسر اٹی اڑاند شاغنگ نا کوشست کننگ اٹی ءُ، ولے اوفتا دا کوشست آتے امر کہ مرے بے سہب کننگک۔ او پارے کہ ریاستی ادارہ و الس اوار مرسا دہشت گردی نا برخلاف جنگ ءِ ایسر اسکان سرکیرہ۔ صدر مملکت دا عزم انا درشانی ءِ کرے کہ ہمودے مُر اف ہراتم بلوچستان آن دہشت گردی نا پورو چٹک و صوبہ امن، شونداری و شونہالی نا پوسکن آ مزل آتا کنڈ آ مونی کاہک۔ وزیراعلیٰ میر سرفراز بگٹی پارے کہ بلوچستان نا الس امن خواہک و صوبائی حکومت الس نا دا استخواہی ءِ عملی دروشم تننگ کن کل دوئی وسیلہ غاتے کاریم اٹ اتنگ اٹی ءِ۔ او پارے کہ دہشت گردی نا برخلاف قوم و ریاست نا قربانیک زیان مفسہ و بلوچستان ءِ امن و شونداری نا سوگو آ بنجا جوڑ کننگک۔ اوڑدہی ٹی پاکستان پیپلز پارٹی زالبول ونگ انا صدر فریال تالپور و بلوچستان نا مسکوہی صوبائی وزیر میر علی حسن زہری ہم ساڑی ئس۔