میر حاصل بزنجو مچ زند ءِ جمہوریت، آئین نا بالادستی نا جہد اٹ تدیفے،میر رحمت صالح بلوچ

نیشنل پارٹی نا بنجائی راہشون و بلوچستان اسمبلی اٹی ڈپٹی پارلیمانی لیڈر میر رحمت صالح بلوچ میرِ جمہوریت میر حاصل خان بزنجو نا کزیہ دے آ اودے خراجِ تحسین پیش کرسا پارینے کہ میر حاصل خان بزنجو تینا مچ آ سیاسی زند ءِ جمہوریت، آئین نا بالادستی، پارلیمانی سیاست، قومی حق و السی واک انا جہد اکن گدریفے۔ اونا جہد و سیاسی پامداری اینو ہم بلوچستان و ملک انا سیاسی کارندہ غاتیکن کسر نا ڈیواءِ۔ تینا اسہ بیان اسے ٹی میر رحمت صالح بلوچ پارے کہ اینو نن میرِ جمہوریت میر حاصل خان بزنجو نا کزیہ دے ءِ ہندن ءُ وخت اسے آ اڈ تننگ اٹی اُن ہراتم مچ آ بلوچستان اٹ سیاسی، راجی و زرگزرانی حالیت آک بھاز خراب ءُ، الس اٹی نااومیتی ودنگ اٹی ءِ و سیاسی بے باوری راج انا چندی تپہ غاتے زہمی کرینے۔ دا حالیت آتے ٹی میر حاصل خان بزنجو نا فکر، سیاسی پامداری و جمہوری جہد انا اہمیت مہالو آن کیہی ہموخس زیات ودانے۔ او پارے کہ میر حاصل خان بزنجو سخت انگا سیاسی حالیت آتیٹی ہم جمہوری و آئینی کسر ءِ الیتو۔ او واک انا جاگہ غا دلیل، جھیڑہ نا جاگہ غا سیاسی ہیت و گپ و غیر جمہوری وڑ و ڈول نا جاگہ غا پارلیمانی جہد آ پت کرے۔ ہندا سوب ءِ کہ او بلوچستان نا سیاست اٹی اسہ ہندن ءُ توار اسے نا وڑ اٹ مدام یات تخنگک ہرا اصول آتیا سمجھوتہ کننگ آن بیدس الس نا حق انا ہیت ءِ کرے۔ میر حاصل خان بزنجو بیرہ نیشنل پارٹی نا راہشون الو بلکن او بلوچستان و ملک انا جمہوری سیاسی کارندہ غاتیکن اسہ قومی سیاسی میرات اس ئس۔ او بلوچستان نا قومی سوج ءِ پاکستان نا آئینی، جمہوری و بنجائی پنجر اٹ مرسا سیاسی وڑ اٹ پیدوار کرے و مدام دا ہیت آ زور شاغا کہ ویل آتا ایسری توفک، واک و بیدادی ٹی اف بلکن سیاسی مذاکرات، آئین نا بالادستی و الس نا حقی مینڈیٹ اٹی ءِ۔ او پارے کہ میر حاصل خان بزنجو تینا سیاسی جہد انا وخت آ آمریت، غیر جمہوری واک و سیاسی بیدادی نا برخلاف پبی توار چست کرے۔ اونا سیاست نا بنداوی مسخت پارلیمنٹ ءِ سوگو کننگ، بنجائی اکائی تا حق انا رکھ‘ جمہوری ادارہ غاتا بالادستی و لس شاری ءِ سیاسی عمل اٹی واکدار جوڑ کننگ ئس۔ او پارے کہ ساڑی حالیت آتیٹی بلوچستان نا الس ءِ نااومیتی آن کشنگ کن ہندن سنجیدہ، مُر ہُروک و اصولی سیاست نا گرج ءِ۔ سیاسی جماعت و جمہوری واک آتے اختلاف آتیان ایڑتر مرسا السی ویل آتا ایسری، صوبہ نا حق آتا رکھ و جمہوری ادارہ غاتا سوگوی کن اسیجائی جہد کروئی مریک۔ او پارے کہ بلوچستان نا ورناک اینو روزگار، تعلیم، جانجوڑی، امن و تینا آخبت نا بابت بے کچ سوج آتتون مون تروئی تمنگ اٹی ءُ۔ دا حالیت آتیٹی سیاسی سرکڑدہ غاتا زمواری ءِ کہ او الس اٹ اومیت ودی کیر‘ اوفتے سیاسی عمل تون گنڈر و ویل آتا پرامن و جمہوری ایسری کن بھرمی جہد کیر۔ او پارے کہ میر حاصل خان بزنجو نا کل آن بھلا میرات اونا سیاسی کڑدار، اصول پسندی و جمہوریت آ نزور مفروک پت ءِ۔ او جندی فائدہ غاتا جاگہ غا جم قومی و جمہوری فائدہ غاتے اولیت تس و تینا زند انا گڈیکو ساہت اسکان سیاسی جہد ءِ برجا تخا۔ او پارے کہ میر حاصل خان بزنجو نا جند ننا نیام اٹی ساڑی اف ولے اونا سیاسی فکر، جہد و جمہوریت تون وابستگی اینو ہم سیاسی کارندہ غاتیکن راہشونی نا وسیلہ اسے۔ اونا جہد ءِ مونی دننگ اودے حقیقی خراجِ تحسین پیش کننگ نا جوان آ کسر ءِ۔ میر رحمت صالح بلوچ میرِ جمہوریت میر حاصل خان بزنجو نا سیاسی و جمہوری خذمت آتے سلام پیش کرسا پارے کہ اونا پن بلوچستان نا سیاسی تاریخ اٹی مدام شرف‘ اصول پسندی و جمہوری جہد انا حوالہ اٹ زندہ سلک۔ پنجگور (نامہ نگار)