استاد آک طالب علم آتے نصاب تون اوار لائخ ہم جوڑ کیر،اسسٹنٹ کمشنر ماشکیل

اسسٹنٹ کمشنر ماشکیل ثناء اللہ بلوچ گورنمنٹ بوائز ہائر سیکنڈری اسکول لدگشت نا دورہ ءِ کرے ہراڑے او کلاس روم آتیٹی ہنسا تدریسی سرجز، نصاب نا تدریس و طالب علم آتا تعلیمی کارکڑد نا جاچ ءِ ہلک۔ دا وخت آ او اسکول اٹی برجا نصابی و غیر نصابی سرجز آتا ہم جاچ ءِ ہلک وطالب علم آتا جم لائخی تا جاچ ءِ ہلک۔ اسسٹنٹ کمشنر جتا جتا جماعت آتا طالب علم آتتون دراست ہیت وگپ کرے و اوفتیان تعلیمی و عمومی وڑ انا سوج کرے، طالب علم کنڈ آن تروک ورندی، حاضر جوابی، ذہانت و خواننگ نوشتہ کننگ نا لائخی تا ستا ءِ کرسا او اوفتا است بڈی ءِ کرے۔ اسسٹنٹ کمشنر دا ہیت آ گڑتی نا درشانی ءِ کرے کہ بھلا جماعت آتا گڑاس طالب علم سوج آتا ورندی تننگ اٹی ہبکہ و کم پتداری نشان تسر۔ او استاد آتے پارت کرے کہ طالب علم آتے بیرہ نصابی تعلیم اسکان کچ اٹ النگپ بلکن اوفتیٹی پتداری، ہیت کننگ و سرکڑدہی لائخی و تینا ہیت ءِ گچین وڑ اٹ پیش کننگ نا ہمت ہم ودی کننگے۔ او استاد آتیا زور شاغا کہ کلاس روم اٹی طالب علم آتے سوج کننگ، تینا سلاہ نا درشانی کننگ و جتا جتا سرجز آتیٹی بشخ ہلنگ نا پبی وارخواہی فراوان کننگے انتئے کہ اسہ سرسہب طالب علم اس بیرہ کتابی علم آخا بلکن پتداری، شعور و عملی لائخی تیان ہم شپ مریک۔ اسسٹنٹ کمشنر پارے کہ استاد راج انا آخبت نا جوڑ کروک ءُ ہندا سوب آن اوفتا زمواری ءِ کہ او طالب علم آتا تعلیمی ہیلکاری تون اوار اوفتا شخصیت سازی آ ہم خاص چکار کیر۔ او نصابی سرجز آتتون اوار غیر نصابی سرجز آتے ہم شون تننگ نا گرج آ زور شاغا تاکہ طالب علم آتا لائخی تے پین گچین کننگ مرے۔ داوخت آ او اسکول نا تعلیمی چاگڑد ءِ پین جوان کننگ کن استاد آتا کوشست آتا ستا ءِ کرے و طالب علم آتے خواری، نظم و ضبط و پدریسہ مطالعہ نا کمک اٹ تینا لائخی تے جوان کننگ نا پارت کرے۔ دورہ نا وخت آ استاد و طالب علم آک اسسٹنٹ کمشنر نا تعلیمی سرجز آتیٹی استخواہی و است بڈی ءِ ستاکڑزوک گوندار۔ داوخت آ اسکول ہیڈ ماسٹر عطاء اللہ حسنی تون اوار ایلو اسٹاف ہم ساڑی ئس۔ ماشکیل (نصیر کبدانی/ نمائندہ خصوصی)