چاغی، بجلی نا پوسکن آ ٹائم ٹیبل آ شاری تا برانز

چاغی ٹی بجلی نا پوسکن آ ٹائم ٹیبل آن الس بھاز فریشان ءِ‘مست انا بجلی ٹائم ٹیبل ءِ بحال کننگے، کمامدار آک نوٹس ہلیر۔ سرجم حوال آتا رِداٹ چاغی بلوچستان نا باسن انگا شار تیٹی حساب مریک‘ شار اٹی کیسکو نا کنڈ آن بجلی نا پوسکن آ ٹائم ٹیبل جاری کننگ آ شاریک برانز کرینو۔ چاغی نا پوریاگر برادری و اُرا ئی صارف آک پارینو کہ بھلا باسنی ٹی گھنٹہ غاتا گھنٹہ لوڈشیڈنگ آن زند عذاب مسنے۔ چنا، پیر انگا و ناجوڑ آک باسنی نا سوب آن بھاز فریشان ءُ، کاروبار بھس مننگ اٹی ءِ‘ اوفک پاریر کہ چاغی شار اٹی بجلی نا مستین نا ٹائم ٹیبل ءِ بحال کننگے۔ شاریک ایم پی اے چاغی حاجی صادق خان سنجرانی، میر اعجاز خان سنجرانی و کیسکو بلوچستان آن نوٹس ہلنگ نا خواست کرسا پاریر کہ السی فائدہ ءِ مون آ تخسا ٹائم ٹیبل نا اولسر جاچ ءِ ہلنگے و چاغی شار انا مست انا بجلی ٹائم ٹیبل ءِ بحال کننگے۔ چاغی (نامہ نگار)