آبنائے ہرمز ملنگ انگ نا کم وختی معاہدہ نا گمانک روشنا ءُ،صدر ٹرمپ نا دعویٰ

امریکی صدر ڈونلڈ ٹرمپ پارینے کہ ایران تون برجا جنگ بھاز زوت تینا ایسر اسکان سر مننگ کیک، وخت اس کہ امریکہ، ایران و عمان نا نیام اٹی آبنائے ہرمز ءِ دوارہ بحری ہن وبر کن ملنگ نا بابت معاہدہ نا گمانک ہم خڑک تمانو‘ ایلو کنڈ آ جنگ بندی نا کوشست آتیان پد ہم ڈیہہ اٹی چک و تاڑ برجا ءِ‘ ایران ملک اٹی سیکورٹی ءِ پین سخت کرینے وخت اس کہ یمن اٹی ہم جلہو آتا حوال آک مونی بسنو۔ امریکی صدر ڈونلڈ ٹرمپ صحافی تتون ہیت و گپ کرسا پارے کہ کنے اومیت ارے کہ ایران تون برجا جنگ بھاز زوت چٹک۔ اوپارے کہ ایران دا حالیت ءِ بھاز ہُرے اسکان سگنگ کپک و سفارتی کوشست آتا جوان بھرم آک مون آ بننگ کیرہ۔ ایلو کنڈآ سفارتی حوالی تا رِد اٹ امریکہ، ایران و عمان آبنائے ہرمز ءِ دوارہ ملنگ کن اسہ وختی ءُ معاہدہ اسے نا خڑک آ سرمسنو۔ سلاہ ئی بست و بند نا رِد اٹ خلیج اٹی بحری جہاز آتا رکھوک ہن وبر ءِ دوارہ ملنگ نا کوشست کننگ انگ ءِ‘ ولے معاہدہ نا پک سرجم حال آک داسکان پک کننگ انگ ءُ۔ آبنائے ہرمز دنیا نا کل آن اہم بحری کسر تے ٹی حساب مریک‘ ہراڑے جہانی کہول آ تیل و قدرتی گیس انا بھلو کچ اس گدرینگک۔ برجا جنگ انا سوب آن دا کسر آ چک و تاڑ جہانی توانائی نا مارکیٹ آتیٹی ہم بے چیٹی ودی کرینے۔ ایلو کنڈ آ امریکہ و اسرائیل تون جنگ انا چٹفنگ کن سفارتی رابطہ غاک داسکان ہچ ءُ پک بھرم اس تننگ کتنو۔ دا وخت آ ایرانی کمامدار آک مچ آ ملک، خاص وڑ اٹ دارالحکومت تہران اٹی سیکورٹی ءِ پین سخت کرینو۔ حوال آتا رِد اٹ حساس تنصیبات، سرکاری ماڑی و اہم شاہراہ تیا چاروکی ءِ ودفنگانے۔ یمن اٹی ہم چک و تاڑ برجا ءِ۔ یمنی فورس آتا رد اٹ حوثی باغیک خودکش ڈرون و بیلسٹک میزائل آتیٹی جلہو کریر، ہرافتے ٹی کم و ود 18 فوجی شہید مسر۔