(ن) لیگ مظفرآباد اٹ حکومت جوڑ کننگ کپک، اسلام آباد ہم کاہک ایان تے، بلاول بھٹو زرداری

چیئرمین پاکستان پیپلز پارٹی بلاول بھٹو زرداری پارینے کہ پیپلز پارٹی مذاکرات و ہیت و گپ آ باور کیک، ویل آتا ایسری بیرہ مذاکرات و مفاہمت نا کمک اٹ مننگ کیک‘ مسلم لیگ (ن) نا دا غلط فہمی ءِ کہ او مظفرآباد اٹی حکومت جوڑ کیک‘ اسلام آباد نا ہم ن لیگ آن ہننگ نا ریسہ نا بنا مسنے۔ آزاد کشمیر نا ضلع باغ اٹی گچین کاری جلسہ غان تران کرسا بلاول بھٹو زرداری پارے کہ پیپلز پارٹی نا بنائی دے آن دا موقف مسنے کہ کل ویل آتا ایسری مذاکرات تون گنڈوک ءِ۔ وخت اس کہ راستی و مفاہمت کمیشن ہم دا رد اٹ اہم ءُ کڑد اس ادا کننگ کیک۔ او پارے کہ آزاد کشمیر نا ساڑی حالیت آ ہر کشمیری نا است ڈکھیا و ہر پاکستانی فریشان ءِ‘ اسہ کنڈ آ سیکورٹی ادارہ غاتا کارندہ غاک شہید مننگ اٹی ءُ وخت اس کہ ایلو کنڈ آ کشمیری تا دتر وہنگ اٹی ءِ‘ بلاول بھٹو پارے کہ داسہ راست کمیشن جوڑ کننگ کنا جندا نا سلاہ سلتنے بلکن آزاد کشمیر اسمبلی ٹی ہم دا بابت قرارداد منظور مسنے۔ راست کمیشن ہرا وخت اسکان تینا کاریم ءِ پورو کپک، برانز کروک آک برانز ءِ بس کیر و کارروائی کروک آک ہم تینا کارروائی تے تورر۔ او پارے کہ داسہ راست کمیشن نا جاست پاست آن پد دا پک مریک کہ دیر ڈوہ کرے دیر کانود ءِ دوٹی ہلکنے تو اونا برخلاف کانود نا رِد اٹ کارروائی مریک ولے اگہ اسہ بندغ اسے آ غلط دوبہ خلنگاسس تو بایدے اوڑتون ہم انصاف مرے۔ پیپلز پارٹی نا چیئرمین پارے کہ ویل نا ایسری ہندادے کہ الس و اسمبلی نا سلاہ ءِ اہمیت تننگے و آزاد کشمیر اٹی امن اتنگے تانکہ لس شاری تا زند دوارہ مست آنبار مرے۔ او پارے کہ ساڑی حالیت نا گچین آ ایسر سفا، شفاف و انصاف آ تالان گچین کاریک ئسر، ہندن ءُ ایوان اس جوڑ مروئی تمک ہراڑا مچ آ کشمیر آ پت مرے۔ بلاول بھٹو زرداری پارے کہ آزاد کشمیر نا تاریخ اٹی ہچ دن متویسس کہ گچین کاریک اسہ، اِرا یا مسٹ آخا بلکن 6 ریسہ ٹی کرفنگار۔ اگہ کشمیر اسٹ ءِ تو گچین کاریک ہم بایدے اسہ دے آ کننگوسر۔ او پارے کہ مسلم لیگ (ن) نا دا غلط فہمی اے کہ او مظفرآباد اٹی حکومت جوڑ کیک‘ بلکہ اسلام آباد ہم ن لیگ آن کاہک۔ بلاول بھٹو پارے کہ بھلا بندغ آک ہم پاننگ اٹی ءُ کہ نظام بھس مسنے و السی ویل آتیٹی ودکی مننگ اٹی ءِ۔ اصل چک وتاڑ اسلام آباد و لاہور نا ءِ‘ وزیراعظم شہباز شریف تون ننا ہچ ءُ جھیڑہ اس اف۔