کل خواری تیان پد ہم کشمیریک جیرت اٹ زوراکی نا مون آ سلوک ءُ،وزیراعظم محمد شہباز شریف

وزیراعظم محمد شہباز شریف پارینے کہ کل خواری تیان پد ہم کشمیری الس نا حوصلہ، استقامت و سوگو عزم اینو ہم نزور مفروک ءِ‘۔ تینا چٹپروک وتواجہی نا حق انا دوئی کننگ کن اوفتا پرامن و انصاف آ تالان جہد اینو ہم نسل آتے کن کسر نا ڈیواءِ‘ جہانی برادری ءِ زموارانہ کڑد ادا کروئی مریک‘۔ کشمیری تا یومِ استحصال آ کلہو اٹی وزیراعظم شہباز شریف پارے کہ اینو یومِ استحصال نا وخت آ حکومت پاکستان و مچ آ پاکستانی قوم تینا کشمیری ایلم و ایڑھ تتون پبی وڑ اٹ نزور مفروک یکجہتی نا درشانی ءِ کیک۔ نن دا دے ءِ دا عزم اتون اڈ ایتنہ کہ دنیا ءِ بھارت نا 5 اگست 2019 نا ہمو کانود آن چَپ وتینا خود آن کروک گام گیج آتا نسخان یات ترفنگے ہرافتا کمک اٹ او کانود آن چَپ وڑ اٹ بھارت نا کوزہ کروک جموں و کشمیر (IIOJK) نا جہانی کہول آ امنائی جھیڑہ ئی حیثیت ءِ بدل کننگ نا کوشست کرے۔ دا گام آک جہانی کانود و اقوامِ متحدہ نا سلامتی کونسل نا تعلقدار قرارداد آتیان اسُل چَپ ءُ۔ وزیراعظم پارے کہ ہفت سال گدرینگ آن پد ہم دا کانودآن چَپ گام آک نئے تو جموں و کشمیر نا کانودی حیثیت ءِ بدل کننگ کرینو و نئے کشمیری الس نا تینا روا انگا وتواجہی نا حقِ انا دوئی کننگ کن سوگو آ عزم ءِ نزور کننگ کرینو۔ دا گام آک بھارتی ریاستی بیدادی ٹی ودکی کریر، بنداوی آجوئی تے کچ اٹ تخار و کانود آن چَپ کانود سازی و انتظامی گام گیج نا کمک اٹ مقبوضہ علاقہ نا آبادیاتی کچ ءِ بدل کننگ نا لغور کوشست آتے پین ترند کریر۔ بھارت نا کوزہ کروک جموں و کشمیر اٹی الس نا حقی السی سرکڑدہ غاتیا زورشاغنگ‘ شاری آجوئی تیا رکھ خلنگ و آجو میڈیا غا رکھ ءِ برجا تخنگ گڑتی ناسوب ءِ۔ وزیراعظم پارے کہ دا کل خواری تیان پد ہم کشمیری الس نا حوصلہ، استقامت و سوگو عزم اینو ہم نزور مفروک ءِ۔ تینا چٹپروک وتواجہی حق انا دوئی کننگ کن اوفتا پرامن و انصاف آ تالان جہد اینو ہم نسل آتا راہشونی کن کسر نا ڈیواءِ۔ کشمیری تا بے مٹ آ جہد انصاف، انسانی وقار و جہانی کانود نا بالادستی آ پت تخوک آ کل بندغ و قوم انا مخ تفی و شرف انا حقدر ءِ‘ جموں و کشمیر نا جھیڑہ سویلی ایشیا ٹی امن و سوگوی کن کل آن بنداوی و ایسر خواہک ویل اسے۔ڈیہہ اٹی مدامگی امن، واک انا کاریم اٹ اتنگ یا تینا خود آن کروک گام تیان اف بلکن کشمیری الس نا استخواہی و اقوامِ متحدہ نا سلامتی کونسل نا تعلقدار قرارداد آتا رِد اٹ دا جھیڑہ نا انصاف اٹ و پرامن ایسری ٹی ءِ۔ وزیراعظم پارے کہ جہانی برادری ءِ بیرہ گڑتی نا درشانی اسکان کچ اٹ مننگ نا جاگہ غا دا متکن آ جھیڑہ نا انصاف و مدامگی ایسری کن تینا بھرمی و زموارانہ کڑد ءِ ادا کروئی مریک۔ وزیراعظم پارے کہ دا وخت آ ای اسہ وار ولدا دا ہیت نا اردگی ءِ کیوہ کہ جموں و کشمیر نا جھیڑہ نا انصاف اٹ و پرامن ایسری پاکستان نا خارجہ پالیسی نا بنداوی تمبہ ءِ۔ پاکستان کشمیری الس نا سفارتی، سیاسی و اخلاقی مخ تفی ہر کہول آ برجا تخک و اوفتا توار ءِ ہر علاقائی و جہانی فورم آ پورو واک اٹ بڑزا کیک۔