سندھ بلوچستان جشن آزادی کپ 2026ء نا رِد اٹ گوادر اٹ میچ آک برجا

سندھ بلوچستان جشنِ آزادی کپ 2026 شہید ڈپٹی کمشنر ذاکر بلوچ فٹبال ٹورنامنٹ نا رد اٹ بابائے بزنجو فٹبال اسٹیڈیم گوادر اٹی ڈسٹرکٹ فٹبال ایسوسی ایشن گوادر نا صدر میر ارشد کلمتی نا کماشی ٹی برجا فٹبال ٹورنامنٹ نا گچین آ گوک پورو جم وجوش اٹ برجاءُ۔ ٹورنامنٹ اٹی گوازی کننگوک اہم میچ اٹی شاہد میموریل فٹبال کلب کراچی گچین گوازی کرسا ڈی ایف اے حب ءِ صفر نا مون اٹ چار گول اٹ کٹسا سرسہبی ءِ تینا پن آکرے۔ فٹبال ہُروک آتا بھلو کچ اس میچ ءِ ہُرا و ہڑتوم آ ٹیم تا است بڈی ءِ کرے۔ میچ انا خاص انگا مہمان چیئرمین ضلع کونسل گوادر شئے مختار بلوچ ئسکہ، ہرانا اسٹیڈیم آ بننگ آ اودے بخیر کننگا۔ دا وخت آ خاص انگا مہمان نا ہڑتوم آ ٹیم تا وگوازی گر و میچ آفیشل آتتون درستی راستی کرفنگا، وخت اس کہ او میچ نا بنا غان مست گوازی گرتتون سلام دعا ہم کرے۔ دا وخت آ تران کرسا شئے مختار بلوچ پارے کہ گوازی ورنا تا ذہنی و جونی ردوم، مثبت سوچ، نظم و ضبط، سگ و سیوت ءِ مونی دننگ اٹی سرکڑدہی کڑد ادا کیک۔