چائنیز ایمبیسیڈر اسکالرشپ ،یونیورسٹی آف مکران اٹی اولیکو وار باقاعدہ نیڈ بیسڈ اسکالر شپ نا بنا

یونیورسٹی آف مکران اٹی چائنیز ایمبیسیڈر اسکالرشپ نا رِد اٹ 125 حقدارمار ومسڑ طالب علم آتیٹی اسکالرشپ لیٹر بشخ و پانٹ کننگا۔ یونیورسٹی آف مکران پنجگور اٹی چائنیز ایمبیسیڈر اسکالرشپ نا رِد اٹ حقدار طلب علم آتے اسکالرشپ لیٹر بشخ و پانٹ کننگ نا اسہ گچین ءُ دود اس اڈ ہلک۔ دا اسکالرشپ چائنیز ایمبیسیڈر نا کنڈ آن یونیورسٹی آف مکران ءِ فراوان کننگاسس، وخت اس کہ یونیورسٹی آف مکران اودے تینا شفاف نیڈ بیسڈ اسکالرشپ نا رِد اٹ مالی وڑ اٹ حقدار طالب علم آتیٹی بشخ و پانٹ کرے۔ دود انا خاص انگا مہمان وائس چانسلر پروفیسر ڈاکٹر میر سادات بلوچ گچین مروک آ طالب علم آتے ٹی اسکالرشپ لیٹرز بشخ و پانٹ کرے۔ دا وخت آ ڈین یونیورسٹی آف مکران ڈاکٹر محمد یونس بلوچ و اسسٹنٹ ڈائریکٹر اسٹوڈنٹ افیئرز عطا مہر ہم ساڑی ئس۔ وائس چانسلر یونیورسٹی آف مکران دا وخت آ تران کرسا پارے کہ یونیورسٹی آف مکران مدام دا ہیت آ باور کیک کہ اسہ لائخ ءُ طالب علم اس بیرہ مالی سختی تا سوب آن بڑزکو تعلیم آن محروم مف۔ او چائنیز ایمبیسیڈر نا کنڈ آن فراوان کروک دا نہادی اسکالرشپ ءِ پاک چین ایلمداری، تین پہ تینی پت و تعلیمی کمک نا عملی درشانی گوندسا دا گام انا ستاءِ کرے۔ وائس چانسلر پارے کہ یونیورسٹی آف مکران اٹی اولیکو وار باقاعدہ نیڈ بیسڈ اسکالرشپ نا بناءِ کننگانے، ہرانا رِد اٹ مالی وڑ اٹ حقدار طالب علم آتا کمک کن اسہ منظم و شفاف نظام اس پیدوار کننگانے۔ چائنیز ایمبیسیڈر اسکالرشپ ءِ ہم ہندا پروگرام نا رِد اٹ بشخ و پانٹ کننگا تانکہ دا آسراتی حقی آ حقدار طالب علم آتسکان سر مرے۔ او پارے کہ دا پروگرام نا رِد اٹ 125 حقدار طالب علم ءِ پورو شفافیت و کنڈہلپروک وڑ اٹ نیڈ بیسڈ اسکالرشپ کمیٹی گچین کرے۔ کمیٹی ٹی یونیورسٹی نا نمائندہ غاتیان بیدس ضلعی انتظامیہ و پیشن نا تعلیمی چاہندار ہم اوار ئسر، ہرافک میرٹ و مالی گرج ءِ مون آ تخسا حقدار طالب علم آتے گچین کریر۔ وائس چانسلر مستی پارے کہ دا اسکالرشپ طالب علم آتا ٹیوشن فیس اٹی ایڈجسٹ کننگک‘ ہراڑان حقدار طالب علم آک تینا تعلیم ءِ بے اڑاند آن برجا تخنگ کیرہ۔ او پارے کہ یونیورسٹی نا کوشست ءِ کہ ہر طالب علم ءِ بریبر تعلیمی وارخواہی رسینگے و اسہ طالب علم اس مالی ویل آتا سوب آن تینا تعلیم ءِ نیمہ غا الپ۔ وائس چانسلر دا ہیت آ ہم زور شاغا کہ یونیورسٹی آف مکران نئے بیرہ ضرورت مند طالب علم آتا مالی کمک کن گام گیج کننگ اٹی ءِ بلکن ہر سمسٹر اٹ میرٹ اسکالرشپ پروگرام ہم باقاعدگی اٹ برجا تخانے، ہرا نا رِد اٹ نمان تعلیمی کارکڑد نشان تروک طالب علم آتے اوفتا لائخی و میرٹ نا بنداو آ اسکالرشپ تننگک۔ ہندا وڑ یونیورسٹی اسہ کنڈ آ حقدار طالب علم آتا کمک ءِ پک کننگ اٹی ءِ تو ایلو کنڈ آ علمی پڑ اٹی جوان کارکڑد نشان تروک آ طالب علم آتا است بڈی ءِ ہم کننگ اٹی ءِ۔ دود انا اخیر اٹ وائس چانسلر پروفیسر ڈاکٹر میر سادات بلوچ چائنیز ایمبیسیڈر اسکالرشپ کن چائنہ حکومت نا منتواری ءِ ہرفسا پارے کہ دا وڑ انا تعلیمی کمک آن نئے بیرہ حقدار طالب علم آتے تینا تعلیم ءِ برجا تخنگ اٹی کمک رسینگک بلکن پاکستان و چین نا نیام اٹی متکن آ ایلمداری و تعلیمی حال حوال ہم پین سوگو مریک‘ او دا عزم انا درشانی ءِ کرے کہ یونیورسٹی آخبت اٹی ہم قومی و جہانی ادارہ غاتا کمک اٹ پین اسکالرشپ پروگرام درستی راستی کرفنگ کن تینا کوشست آتے برجا تخک۔ پنجگور (نامہ نگار)