عزمِ استحکام وژن نا رداٹ ،خیبر پختونخوا ٹی انٹیلی جنس بیسڈ کارروائی، چندی خوارج خلنگار

سیکورٹی فورس آتا خیبر پختونخوا ٹی عزمِ استحکام وژن نا رداٹ گچین انٹیلی جنس بیسڈ کارروائی برجاءِ، فورس آک لکی مروت اٹی چندی خوارج آتے دوزخی کرینو۔ سیکورٹی حوالی نا رداٹ لکی مروت اٹی انٹیلی جنس بیسڈ کارروائی تیٹی سیکورٹی فورس آک خوارج آتا چندی ہند آتے بھس کرینو۔ لکی مروت اٹی مروک دا کارروائی تیٹی چندی خوارج آتے دوزخی کننگا، خلنگوک خوارج دہشت گرد آتیان بھلو کچ اسے ٹی سلہہ، منچر و پین گڑاہم دوئی مسنے۔ سیکورٹی حوالی نا رداٹ آپریشن نا وخت آ سیکورٹی فورس آتا دوتے اٹ فتنہ الخوارج نا چندی دہشت گرد آتا ٹھپی مننگ نا ہم حوال آک ءُ۔ سیکورٹی حوالی پارینے کہ کارروائی تیٹی دا ہیت ءِ پک کننگ انگ ءِ کہ الس نا جان و مال انا رکھ مرے و ہندی آبادی ءِ ہچ ءُ نسخان اس مف۔ سیکورٹی فورس آک خیبر پختونخوا ٹی مدامگی امن و دہشت گردی نا پورو چٹفنگ اسکان کارروائی تے برجا تخانو۔ بنجائی وزیر داخلہ محسن نقوی خیبرپختونخوا نا ضلع لکی مروت اٹ عزمِ استحکام وژن نا رداٹ گچین انٹیلی جنس بیسڈ آپریشن نا وخت آ چندی خوارجی تے خلنگ آ سیکورٹی فورس آتا جیرت و کسبی لائخی تے خراجِ تحسین پیش کرینے، وزیرداخلہ تینا اسہ بیان اسے ٹی پارے کہ پاکستان نا بہادر گلزادہ غاک وخت آ کارروائی کرسا لکی مروت اٹ دہشت گرد آتا پراگندہ ارادہ غاتے بے سہب کریر و خوارجی تے عبرتی ایسر اسکان سرکریر۔ مچ آ قوم خیبرپختونخوا ٹی امن و ایمنی کن سیکورٹی فورس آتا سرسہبی و قربانی تے قدر انا نظر اٹ ہرک۔ محسن نقوی دا عزم انا درشانی ءِ کرے کہ فتنہ الہندوستان و فتنہ الخوارج نا پورو چٹفنگ اسکان انٹیلی جنس بیسڈ کارروائی بے سلنگ آن برجاسلک۔ او پارے کہ مچ آ قوم دہشت گردی نا لعنت نا برخلاف اسٹ ءُ و سیکورٹی فورس آتون ہم کوپہ سلوک ءُ۔