میڈیا راج اٹی مثبت بدلی اتنگ نا اسہ بھرمی ءُ وڑ اسے،سائرہ عطاء

سیکرٹری وومن ڈویلپمنٹ سائرہ عطا پارینے کہ میڈیا راج اٹ مثبت بدلی اتنگ نا اسہ بھرمی ءُ وسیلہ اسے۔ صنفی بنداو آ بیدادی (GBV)، چنک سنی نا برام و زالبول و چنا توون تعلقدار حساس باندات آتیا زموار رپورٹنگ وخت نا اہم ءُ گرج اسے۔ دا خیال آتا درشانی او تدوک آ دے محکمہ وومن ڈویلپمنٹ حکومت بلوچستان، بلوچستان یونیورسٹی آف انفارمیشن ٹیکنالوجی، انجینئرنگ اینڈ مینجمنٹ سائنسز (BUITEMS)، اسٹرینتھننگ پارٹیسپیٹری آرگنائزیشن (SPO) و اقوام متحدہ نا ادارہ UNFPA نا اسیجائی کمک اٹ “پروونشل میڈیا فیلوشپ پروگرام” نا بنائی دود آن بیوٹمز نا پنک ہال اٹی تران کرسا کرے۔ او پارے کہ حکومت بلوچستان زالبول آتا حق آتا رکھ، اوفتے واکدار کننگ و رکھوک راج جوڑ کننگ کن کل تعلقدار ادارہ غاتتون اوار مرسا عملی گام گیج کننگ اٹی ءِ۔ او پارے کہ دا میڈیا فیلوشپ پروگرام نا کمک اٹ صحافی تا کسبی لائخی تیٹی ودکی مریک ہراڑان او راستکی آ تالان، بریبر و حساس رپورٹنگ نا کمک اٹ الس اٹی شعور بیدار کننگ اٹی بھرمی کڑد ادا کیرہ۔ دود آن تران کرسا وائس چانسلر بیوٹمز پروفیسر ڈاکٹر خالد حفیظ پارے کہ جامعہ غاک بیرہ تعلیم اسکان کچ افس بلکن راجی گچینی و قومی شونداری ٹی ہم اہم کڑد ادا کیرہ۔ او پارے کہ بیوٹمز ورنا صحافی و میڈیا پروفیشنلز آتے پوسکنوڑ پٹ وپول‘ ہیلکاری و عملی چاہنداری تیان شپ کننگ کن کمک ءِ برجا تخک۔ او پارے کہ میڈیا نا زمواری اٹ رپورٹنگ نئے بیرہ راج اٹی مثبت سوچ ءِ شون ایتک بلکن زالبول و چنا تا حق آتا رکھ، راجی انصاف و مدامگی شونداری نا ہدف آتا دوئی کننگ اٹی ہم اہم کڑد ادا کیک۔ او دا اسیجائی گام ءِ بلوچستان اٹی صحافت نا آب ءِ پین جوان کننگ نا کنڈ آ اسہ اہم ءُ مزل اس گوندا۔ او پروگرام نا بشخ ہلوک آتے پارے کہ بیوٹمز اٹی بی ایس فرانزک سائنسز و بی ایس پبلک ہیلتھ انا اہم آ بشخ آک ہم بنا کننگانو۔ دود آن تران کرسا ڈائریکٹر پبلک ریلیشنز سعید شاہوانی میڈیا نا کڑد انا بابت بشخ ہلوک آتے معلومداری تس۔ دود اٹی سرکاری کمامدار، میڈیا نمائندہ، استاد، طالب علم و زند انا جتا جتا بشخ آتیان تعلقدار بندغ آک بھلو کچ اسے ٹی بشخ ہلکر۔ پروگرام نا گڈسر اٹی بشخ ہلوک آتیٹی یاتگیری شیلڈ بشخ و پانٹ کننگا و اوار فوٹو ہم جوڑ کننگا۔