حب شار اٹی دے آن ہیوی ٹریفک نا پترینگ آ رکھ خلنگ نا فیصلہ

ڈپٹی کمشنر حب کیپٹن (ر) جمعہ داد خان مندوخیل نا کماشی ٹی ضلع حب اٹی ٹریفک مینجمنٹ تون تعلقدار اسہ اہم ءُ دیوان اس اڈ ہلک، ہراٹی حب پول آ ہڑدے ئی بنداو آ ودی مروک ٹریفک جام، شاری تے مون تروک خواری و اوفتا بھرمی و مدامگی ایسری کن جتا جتا سلہ و گام گیج آتا جم جاچ ءِ ہلنگا۔ دیوان اٹی دا ہیت آ زور شاغنگا کہ ضلعی انتظامیہ نا کنڈ آن کروک کل فیصلہ غاک السی غاو و شاری تے پیش بروک خواری تے مون آ تخسا کننگانو تانکہ حب پول آ ٹریفک نا روانی ءِ جوان جوڑ کننگ مرے و الس ءِ سٹی آ فریشانی آن نجات رسینگے۔ دیوان ءِ بریفنگ ترسا پاننگا کہ حب پول آ ٹریفک جام نا مدامگی ایسری کن ضلعی انتظامیہ باندات ءِ تعلقدار بڑزکو کمامدار آتا مون آایس‘ وخت اس کہ رینجرز کمامدار آتتون کیہی دیوان آک ہم اڈ تننگانو‘ دیوان اٹی پاننگا کہ شار انا کنڈ آن بروک آ ہیوی ٹریفک حب پول و رینجرز چیک پوسٹ آ ٹریفک نا روانی ٹی اڑاند نا سوب جوڑ مریک، ہرانا سوب آن ٹریفک جام مریک۔ دیوان اٹی فیصلہ کننگا کہ شار اٹ ہیوی ٹریفک نا پترینگ آ رکھ خلنگک، وخت اس کہ پولیس بھوانی نا ہند آ کل بھلا گاڈی تے تورسا شار اٹی پترینگ آن توننگک۔ ایلو دا کہ LIEDA و شار انا دنگ اٹی پترینگوک آ ایلو گاڈی تا سخت چاروکی ءِ کننگک، وخت اس کہ سٹی پولیس اسٹیشن نا مون آ خاص چیکنگ و ٹریفک کنٹرول نا بست و بند آتے پین بھرمی جوڑ کننگک تانکہ ٹریفک نا روانی برجا سلے و شاری تے جوان سفری آسراتی دوئی مرے۔ دیوان اٹی دا ہم فیصلہ کننگا کہ چیف کلکٹر کسٹمز اسلام آباد ءِ اسہ باقاعدہ چٹھی اس راہی کننگک۔ ہراٹی رینجرز چیک پوسٹ نا خڑک ا بنجائی شاہراہ غا سلوک کسٹمز نا ضبط کروک (Seized/Case Property) گاڈی تے دمدستی وڑ اٹ ہموکان گدریفنگ نا خواست کننگک، انتئے کہ دا گاڈیک ہم ٹریفک نا روانی ٹی اڑاند جوڑ مننگ تون اوار حب پول آ ٹریفک جام نا اسہ اہم ءُ سوب اسے ءُ۔ ڈپٹی کمشنر حب کیپٹن (ر) جمعہ داد خان مندوخیل کل تعلقدار ادارہ غاتے پارت کرے کہ ٹریفک مینجمنٹ پلان آ گچین وڑ اٹ دمدستی عملدرآمد پک کننگے تانکہ حب پول آ ٹریفک جام نا ویل انا مدامگی و قابلِ عمل ایسری اس کشنگ مرے و الس ءِ جوان سفری آسراتی فراوان کننگ مرے۔ دیوان اٹی اسسٹنٹ کمشنر حب، ڈی ایس پی ٹریفک، ڈی ایس پی حب، چیئرمین میونسپل کمیٹی حب، چیف آفیسر میونسپل کمیٹی حب، فرنٹیئر کور (ایف سی) نا نمائندہ، محکمہ ایکسائز نا نمائندہ و چیئرمین میونسپل کمیٹی گڈانی بشخ ہلک۔