دہشت گرد آک پراگندہ عزم آتا پوروی کن شاری تے خلنگ ءُ ، حاجی علی مدد جتک

پاکستان پیپلز پارٹی نا بنجائی راہشون و صوبائی وزیر حاجی علی مدد جتک مستونگ اٹی دہشت گرد آتا لغور جلہو اٹ سیشن جج عبدالحکیم کاکڑ و اونا محافظ نا شہیدی آ ارمان، است ہسونی و سخت انگا لوز آتے ٹی مذمت کرینے۔ تینا اسہ ہڑزخواہی و مذمتی بیان اسے ٹی صوبائی وزیر حاجی علی مدد جتک پارے کہ دہشت گرد آک تینا پراگندہ عزم آتے پورو کننگ کن بے گناہ و کودک آ شاری تے خلنگ اٹی ءُ ، ولے دا وڑ انا لغور کارروائی قوم انا حوصلہ غاتے اسُل شیف شاغنگ کپک ۔ او پارے کہ سیشن جج عبدالحکیم کاکڑ اسہ فرض شناس، دیانتدار و کانود نا بالادستی آ باور کروک ءُ جج اس ئس، و اونا محافظ ہم تینا زمواری ءِ پورو کرسا تینا جان ءِ ندر کرے۔ اوفتا قربانی تے مدام یات تخنگک۔ حاجی علی مدد جتک پارے کہ بلوچستان اٹی امن و سوگوی ءِ نسخان رسیفنگ نا ہر سازش ءِ بے سہب کننگک۔ مکار دُشمن نا کنڈآن کروک آ دا لغور جلہو بلوچستان نا الس نا عزم و حوصلہ غاتے نزور کننگ کپک۔ مچ آ قوم دہشت گردی نا برخلاف اسٹ ءِ و امن نا دشمن آتے ہچ ءُ وڑ اسے ٹی تینا پراگندہ مسخت آتیٹی سرسہب مننگ کن النگپک۔ او پارے کہ ریاست امن نا دشمن آتے اوفتا ایسر انجام اسکان سر کننگ کن کل دوئی وسیلہ غاتے کاریم اٹ اتنگ ءِ۔ کانود نافذ کروک ادارہ غاک دہشت گرد آتا برخلاف پبی کارروائی کننگ ءُ و انشاء اللہ دہشت گردی نا ناچوڑ ءِ پورو چٹفنگک۔ صوبائی وزیر پارے کہ بلوچستان نا ہر باتی امن، شونداری و شونہالی نا خواہندار ءِ و دہشت گردی نا برخلاف سوگو ءُ دیوال اسے آنبار سلوک ءِ۔ الس، سیکورٹی فورس و ریاستی ادارہ غاتا اسیجائی جہد آن دشمن نا غٹ پراگندہ عزم آک مش تا مریرہ۔ حاجی علی مدد جتک شہید آتا خاہوت آتتون ہمدردی و ہڑزخواہی نا درشانی ءِ کرسا دعا کرے کہ اللہ تعالیٰ سیشن جج عبدالحکیم کاکڑ و اونا محافظ ءِ جنتی کے و اوفتا درجہ غاتے بڑزا کے، خاہوت ءِ صبرِ ایتے و ٹھپی تے زوت دراخ جوڑکے۔ آمین