بشام نا پِر تیٹی ریسکیو و کمکی گام گیج آتے پین گچین و ترند کننگے، صدر مملکت آصف علی زرداری

صدر مملکت آصف علی زرداری ملک اٹ بشام نا پِرتیٹی ترندی نا رداٹ بنجائی ، صوبائی و ہندی کمامدار آتے پارت کرینے کہ مخلوق نا جان و مال انا رکھ اکن گچین تیاری، ریسکیو و کمکی گام گیج آتے پین گچین و ترند کننگے انتئے کہ ودوک آ پِرتا سوب آن حساس علاقہ غاتیٹی اناگت نوکاپ، ہورہ گروک، گلیشیائی جھل آتا دیر مننگ آن بروک آ نوکاپ، لینڈ سلائیڈنگ، دریاب آتیٹی ترندی و شاری نوکاپ نا خطرہ غاتیٹی ودکی مننگ ءِ۔ پنچ شنبے نادے آ ایوانِ صدر نا پریس ونگ آن جاری بیان نا رداٹ صدر مملکت ساڑی پِر و اوفتا سوب آن نہادی انسانی جان تا زیان و اُرا، بنداوی پنجر و میرات آتے مروک نسخان آ ڈکھیائی و است ہسونی نا درشانی ءِ کرے۔ او زوال مروک بندغ آتا خاہوت آتتون ہڑزخواہی نا درشانی ءِ کرسا زہمی خاہوت آتون پورو یکجہتی نا درشانی ءِ کرے۔ صدر مملکت نیشنل ڈیزاسٹر مینجمنٹ اتھارٹی (این ڈی ایم اے)، صوبائی ڈیزاسٹر مینجمنٹ اتھارٹیز (پی ڈی ایم ایز)، صوبائی حکومت و ہندی انتظامیہ ءِ پارت کرے کہ او تین پہ تینی رابطہ ءِ ہر وڑ اٹ گچین جوڑ کیر و وخت آ بنائی کاریم تے پک کیر۔ او پِر، دریاب آتا وہنگ و بڑزکو آبی کوڑی تیٹی دیر انا کچ انا پدریسہ چاروکی نا گرج آ زور شاغا و خاص وڑ اٹ گلگت بلتستان و آزاد جموں و کشمیر و شیفکو علاقہ غاتے گمانی نوکاپ تون مون تننگ کن پیشگی تیاری تے پورو تخنگ نا پارت کرے۔ صدر مملکت تعلقدار ادارہ غاتے پارت کرے کہ ریسکیو و کمکی وسیلہ غاتے مہالو آن حساس ہند آتیا ساڑی تخنگے، نزور و خطرہ غاتا گواچی آبادی و اہم بنداوی پنجر نا رکھ ءِ پک کننگ تون اواراوار اناگت نوکاپ‘ گلیشیائی جھل تا دیر اتنگ آن بروک آ نوکاپ و لینڈ سلائیڈنگ نا خطرہ والا علاقہ غاتیٹی سیل و سواتی و ایلو بندغ آتا رکھ اکن ہم المی گام گیج کننگے۔ صدر آصف علی زرداری دا ہیت انا ہم پارت کرے کہ غٹ تعلقدار ادارہ غاک ہروخت سنبرینگوک مریر و ہراڑے ہم انسانی جان یا ملکیت آتے خطرہ مرے ہموڑے دمدستی و گچین کارروائی ءِ پک کیر۔ او الس آ زور شاغا کہ او سرکاری پارت آتیا عمل کیر و ترند پِر، اناگت نوکاپ ، لینڈ سلائیڈنگ یا موسم نا بارواٹ ایلو خطرہ غاتا وارننگ والا علاقہ غاتے ٹی بے گرج سفر کپس۔ صدر مملکت کمکی کارروائی کروک ریسکیو کارندہ و ہلہلہ ئی خذمت سرتروک کارندہ غاتا کوشست آتا ستاءِ کرسا مچ آ ملک انا الس نا سلامتی کن دعا کرے۔