امریکہ و ایران نا نیام اٹ بے چیٹی آ اقوام متحدہ نا گڑتی، سفارتکاری آ زور

اقوام متحدہ نا سیکرٹری جنرل انتونیو گوتریش امریکہ و ایران نا نیام اٹ برجاو ودوک آ فوجی بے چیٹی آ گڑتی نا درشانی ءِ کرسا زوت جنگ ءِ توننگ و سفارتی کوشست آتے ترند کننگ آزور شاغانے۔ شنہوا نا رداٹ اقوام متحدہ نا ترجمان سٹیفن دوجارک پارے کہ سیکرٹری جنرل ءِ خاص وڑ اٹ ایران اٹ شاری میرات آتیا مروک جلہو آتیا گڑتی ءِ ہرافتے ٹی پوسکن تفنگوک جوہری بجلی گھر و سمندری دیر ءِ کاریم اٹ اتنگ نا قابل جوڑ کننگ نا پلانٹ اوار ءِ۔ او پارے کہ ڈیہہ انا ایلو علاقہ غاتیٹی ہم بجلی گھر و دیر ساف کروک پلانٹ آتیا جلہو ءِ ہم منپنہ ہرافک بایدے بند مریر۔ ترجمان پارے کہ ہسپتال، دیر انا فراوانی نا نظام و ایلو بنداوی شاری میرات آتا رکھ ءِ کننگے۔ او غٹ فریق آتیا زور شاغا کہ او جہانی انسانی کانود خاص وڑ اٹ شاری تا رکھ انا بارواٹ اصول آتا پورو خیال ءِ کیر۔ اقوام متحدہ نا رداٹ دا تنکی نا زہمک چندی ملک آتیا تالان مسنو ہراڑان واپار، انسانی کمک نا فراوانی، ہن وبر نا خڑچ و ایندھن و بنداوی المی گڑاتا نہاد آک ودانو۔ سیکرٹری جنرل انتونیو گوتریش اسہ وار ولدا پارے کہ ساڑی جھیڑہ نا ہچ ءُ فوجی ایسر اس اف، مدامگی امن کن سفارتی کوشست آتے ترند کننگ نا گرج ءِ۔