پٹرول نا نہاد اٹی 4 روپئی 93 پیسہ و ہائی اسپیڈ ڈیزل نا نہاد اٹی 7 روپئی 15 پیسہ فی لیٹر ودکی

بنجائی حکومت پیٹرولیم مصنوعات نا پوسکن آ نہاد آتا پڑو ءِ کرسا پیٹرول و ہائی اسپیڈ ڈیزل نا نہاد آتیٹی نمان ودکی کرینے، وخت اس کہ ہڑدے ئی بنداو آ نہاد آتا پک کننگ نا پوسکن آ نظام نا برخلاف آل پاکستان پیٹرول پمپ مالکان مچ آ ملک اٹی ہڑتال و پیٹرول پمپ آتے بند کننگ نا پڑو کرینو۔ پیٹرولیم ڈویژن نا کنڈ آن جاری مروک آ نوٹیفکیشن نا رِد اٹ پیٹرول نا نہاد اٹی 4 روپئی 93 پیسے فی لیٹر ودکی کننگانے، ہراڑآن پد پیٹرول نا پوسکن آ نہاد 320 روپئی 73 پیسے فی لیٹر مقرر کننگانے۔ ہنداوڑ ہائی اسپیڈ ڈیزل نا نہاد اٹی 7 روپئی 15 پیسے فی لیٹر ودکی کننگانے، ہراڑآن پد ڈیزل نا پوسکن آ نہاد 367 روپئی 21 پیسے فی لیٹر مسنے۔ پیٹرولیم ڈویژن نا رِد اٹ پوسکن آ نہاد آتا تعین آئل اینڈ گیس ریگولیٹری اتھارٹی (اوگرا) نا سلاہ غاتا رِد اٹ کننگانے و دا نہاد آک 24 گہنٹہ کن نافذ العمل سلور، انتئے کہ حکومت پیٹرولیم مصنوعات نا نہاد آتا ہڑدے ئی بنداو آ تعین نا نظام متعارف کرفینیے۔ ایلو کنڈ آ آل پاکستان پیٹرول پمپ مالکان حکومت نا دا فیصلہ ءِ نمن کرسا سخت گڑتی تا درشانی ءِ کرینو۔ پیٹرول پمپ مالکان نا پاننگ اے کہ ہڑدے ئی بنداو آ نہاد آتیٹی بدلی آن واپاری سرجز آک زہمی مریرہ، زرگزرانی نسخان اٹی ودکی مریک و ڈیلرز آتے سخت خواری تا مون تروئی تمو۔ پیٹرول پمپ مالکان خواست کرینو کہ پیٹرولیم مصنوعات نا نہاد آتا تعین دوارگی تُوئی بنداو آ کننگے و ڈیلرز نا کمیشن اٹی ہم روا وڑ اٹ ودکی کننگے۔