امریکہ نا ایران نا برخلاف پوسکن آ فضائی جلہو آتا اسہ پین ریسہ پورو کننگ نا پڑو

امریکی سینٹرل کمانڈ سینٹکام پڑو کرینے کہ ایران نا برخلاف پوسکن آ فضائی جلہو آتا اسہ پین ریسہ اس پورو کننگانے۔ سینٹکام نا رِد اٹ دا کارروائیک ایران نا ہمو لائخی ءِ نزور کننگ کن کننگانو ہرافتا کمک اٹ او ہرمز تنک آن گدرینگوک واپاری جہاز آتیا جلہو آتے برجا تخنگ کیک۔ بیان اٹی پاننگا کہ امریکی فوج دا ریسہ ٹی ایران نا فوجی کمانڈ سینٹرز، بحری واکداری، میزائل و ڈرون لانچ سائٹس و فضائی دفاعی نظام آتے شست کرے۔ امریکی سینٹرل کمانڈ پارینے کہ ہرمز تنک آن واپاری جہاز آتا ہن وبر پدریسہ برجا ءِ۔ بیان نا رِد اٹ مئی نا اولسر آن دا وخت اسکان امریکی فوج کم و ود 900 واپاری جہاز و 450 ملین بیرل خام تیل انا رکھی ہن وبر اٹ کمک فراوان کرینے۔ سینٹکام مستی پارے کہ امریکی فوج پورو وڑ اٹ تیار ءِ و ہرمز تنک آن آجوئی و رکھی وڑ اٹ گدرینگوک السی بحری جہاز آتا برخلاف ہچ ءُ وڑ اسے نا بے تک ایرانی بیدادی آ ایران ءِ ورندی تننگ کن تینا ہند آ سلوک ءِ۔ایلو کنڈ آ امریکی جلہو آتا ورندی ٹی ایرانی فوج کویت و بحرین اٹی امریکی فوجی ہند و دفاعی نظام آتے شست کرے۔ پاسدارانِ انقلاب تینا بیان اٹی پارے کہ فورس آک کویت نا احمد الجابر ایئربیس آ خلوک بنائی خبڑدار کروک ریڈار، میزائل دفاعی ریڈار سسٹم، ایف پی ایس-117 ریڈار، پیٹریاٹ دفاعی نظام و فضائی دفاع نا سیٹلائٹ مواصلاتی نظام ءِ بھس کریر۔ ایرانی خبر رساں ادارہ تسنیم نا رِد اٹ آئی آر جی سی پارینے کہ دا کارروائی تا مسخت ڈیہہ اٹ ریڈار کوریج ءِ چٹفنگ ئس تانکہ بروک آ وخت اٹی میزائل و ڈرون جلہو آتیکن کسر آوار کننگ مرے۔ ایلو کنڈ آ ایرانی فوج کامی کازی ڈرون تا کمک اٹ کویت اٹی امریکی فوج انا 3 اہم میرات شست کرے۔ ایرانی فوج انا رِد اٹ کیمپ عریفجان اٹی انتظامی ماڑی و سمت شناسی (Direction Finding) اینٹینا، کیمپ العدیری ٹی ہیلی کاپٹر آتا پارکنگ وخت اس کہ احمد الجابر ایئربیس آ فوجی تا ہنکین آتے شست کننگا۔ ایرانی فوج تینا بیان اٹی پارے کہ امریکی فوج انا سرجز آتا سوب آن ڈیہہ انا امن زہمی مسنے و ایرانی سلہہ بند فوج امریکہ نا برخلاف کارروائی تا کمک اٹ ڈیہہ اٹ امن و سوگوی ءِ بحال کننگ نا کوشست کننگ اٹی ءِ۔ کویتی فوج پارینے کہ فضائی دفاعی نظام ایرانی میزائل و ڈرون تے بھس کرے۔ ایلو کنڈ آ پاسدارانِ انقلاب بحرین اٹی ہم امریکی دفاعی میرات آٹیا جلہو تا دعویٰ کرینے۔ سرکاری شینکاری ادارہ نا رِد اٹ آئی آر جی سی پارینے کہ بحرین نا محرق علاقہ ٹی امریکی فضائی دفاعی نظام و ریڈار ءِ بھس کننگا، وخت اس کہ الرفاع اٹی میزائل و ڈرون جلہو نا کمک اٹ امریکی پیٹریاٹ ایئر ڈیفنس سسٹم ءِ ہم شست کننگا۔