اسرائیلی فوج انا فضائی جلہو، فلسطینی اَرے زئیفہ چار چناتون اوار شہید

اسرائیلی فوج جنگ بندی نا معاہدہ غاتا خلاف ورزی نا رد ءِ برجا تخسا سے شنبے نا سہب انا وخت آ غزہ شار آ فضائی جلہو کرے ہراٹی اسہ شاری، اونا اُرائی و اونا چار کودک ءُ چنا شہید مسر۔ فلسطین نا حوالکاری ہند انا رداٹ اسرائیلی جہاز آک غزہ شار انا علاقہ حی الصبرہ ٹی اسہ ہنکینی ہند اسے شست کریر۔ شہید مروک آتیٹی فراس احمد المصری، اونا اُرائی سلسبیل محمد علی المصری و اونا چار چنانعیم، فریال، سلمیٰ و امیرہ اوار ءُ۔ شاہد آتا رداٹ جلہو نا سوب آن ہند اٹ لگوک آ خاخرنا سوب آن کمکار آتے واقعہ نا جاگہ اسکان سرمننگ اٹ خواری پیش بس۔ فائر فائٹنگ نا ٹیمک غزہ میونسپلٹی نا کارندہ غاتا کمک اٹ ہند اٹ لگوک آ خاخر نا مون ءِ توریر و خاخرنا جمجلائی تے خڑک انگا اُراتسکان تالان مننگ آن توریر۔ داکان بیدس اسرائیلی فوج غزہ نا سویلی شار خان یونس نا دے ٹک اٹ سم کاری کرے وخت اس کہ داوخت آ علاقہ ٹی توپ خانہ نا گولہ باری ہم کننگا۔ سے شنبے نا سہب آ خان یونس نا علاقہ مواصی ٹی بئر 19 نا خڑک اسرائیلی فوج انا سم کاری آن اسہ شاری اس ٹھپی مس۔ تدوک آ نن قطبی غزہ ٹی جبالیا کیمپ انا تہہ ٹی ساڑی یمن السعید ہسپتال نا اولیکو مزل آ اسہ صیہونی ڈرون اسے نا جلہو اٹی چار بندغ شہید و پین چندیک ٹھپی مسوسر۔ فلسطینی وزارت جان جوڑی نا حساب آتا رداٹ، تدوک آ سال 10 اکتوبر آ جنگ بندی نا بنا غان ہلیس دا وخت اسکان اسرائیلی فوجی کارروائی تیٹی شہید مروک آتا کچ ودسا 1169 مسنے، داکان بیدس 3756 بندغ ٹھپی مسنو وخت اس کہ 802 لاش ہم کشنگانے۔