ورناک قومی یکجہتی و پاکستان نا روشنا آخبت نا ضمانت ءُ،وزیر اعلیٰ میر سرفراز بگٹی

پاک فوج انا شعبہ تعلقاتِ عامہ (آئی ایس پی آر) نا رِد اٹ مچ آ ملک انا طالب علم آتیکن اڈ تروک سمر کیمپ 2026 نا رد اٹ وزیراعلیٰ بلوچستان میر سرفراز بگٹی شریدار آتتون اسہ خاص ءُ دیوان اس کرے، ہراٹی بلوچستان نا ساڑی حالیت، دہشت گردی نا چیلنج، قومی یکجہتی و ورنا تا کڑد آ خوڑتی اٹ خیال آتا درشانی کننگا۔ دیوان نا وخت آ طالب علم آک جتا جتا قومی و ضلعی باندات آتیا سوج کریر، ہرافتا وزیراعلیٰ سرجم ورندی تس۔ آئی ایس پی آر نا رِد اٹ سمر کیمپ 2026 اٹی پاکستان نا 18 آن ود اسٹیشن تیان چار ہزار آن زیات طالب علم بشخ ہلنگ اٹی ءُ۔ دا پروگرام نا مسخت ورنا تیٹی قومی پام، مثبت اقدار، سروکی نا لائخی و ہم گرنچی ءِ شون تننگ ءِ۔ وزیراعلیٰ بلوچستان میر سرفراز بگٹی گپ و تران نا وخت آ بلوچستان نا امن وایمنی نا حالیت، دہشت گردی نا برخلاف برجا گام گیج و ورنا تا قومی زمواری تیا ہیت کرے۔ او پارے کہ قومی سیوت، تین پہ تینی پت، یکجہتی و ورنا تا مثبت سوچ سوگو، مستحکم و پرامن پاکستان نا ضمانت ءِ‘ وخت اس کہ پاکستان مدام سلیسنے و مدام کن سلک۔ فتنہ الہندوستان و داڑتون تعلقدار پراکسی تیا ہیت وگپ کرسا وزیراعلیٰ پارے کہ دا تنظیم آتے بھارتی اودیم ایجنسی “را” نا مخ تفی دوئی ءِ‘ او مستی پارے کہ اوغانستان کیہی پارت و دوحہ معاہدہ غان پد ہم تینا ڈغار آ ساڑی دہشت گرد آتا برخلاف بھرمی کارروائی کتنے۔ خاص دیوان اٹی طالب علم آک دہشت گردی، زرکاری، اسمگلنگ، سوشل میڈیا و بلوچستان تون تعلقدار ایلو اہم باندات آتیا سوج کریر، ہرافتا وزیراعلیٰ راستکی و حکومتی موقف نا رد اٹ سرجم ورندی تس۔ داکان بیدس وزیراعلیٰ پارینے کہ برطانیہ و بلوچستان نا کمکاری آن السی آسودہی نا ہدف آتے دوئی کننگ اٹ کمک رسینگک، دا ہیت آتے او برطانوی ہائی کمشنر تون گپ و تران اٹی کرے۔ وزیراعلیٰ بلوچستان میر سرفراز بگٹی تون پاکستان اٹ برطانیہ نا ہائی کمشنر گودی جین میریٹ اوڑدہی کرے، ہراٹی تین پہ تینی است خواہی نا باندات، بلوچستان اٹ شونداری کمک و ہڑتوم آ کنڈآتا رابطہ غاتے مونی دننگ آ سرجم گپ و تران کننگا۔ اوڑدہی نا وخت آ تعلیم، جان جوڑی، گورننس، ادارہ ئی لائخی و زرکاری تون اوار چندی بشخ آتیٹی کمک نا گمان تا جاچ ءِ ہلنگا۔ دا وخت آ وزیراعلیٰ بلوچستان برطانوی ہائی کمشنر ءِ صوبہ ٹی برجاانتظامی اصلاحات، السی راجی آسودہی نا ڈٹ و حکومت نا شونداری اولیت آتیان ہم معلومدار کرے۔ وزیراعلیٰ میر سرفراز بگٹی پارے کہ بلوچستان اٹ امن، مدامگی شونداری، گچین حکمرانی و الس ءِ گچین آسراتی تا فراوانی حکومت نا اولیت آتیٹی اوار ءِ۔ او پارے کہ صوبائی حکومت شفافیت، گچین گورننس و شونداری عمل ءِ پین گچین جوڑ کننگ کن جامع اصلاحات آ عمل کننگ ءِ۔ او پارے کہ بلوچستان معدنی وسیلہ، جغرافیائی اہمیت و زرکاری نا گیشتر وارخواہی تیان شپ صوبہ ءِ، ہراڑے جہانی شریدار آتا کمک اٹ شونداری و شونہالی نا پوسکن آ گمان ودی کننگ انگ ءِ۔ وزیراعلیٰ دا اومیت نا درشانی ءِ کرے کہ برطانیہ و بلوچستان نا نیام اٹ چندی بشخ آتیٹی کمکاری پین سوگو مریک، ہراڑان السی آسودہی و مدامگی شونداری نا ہدف آتے دوئی کننگ اٹ کمک رسینگک۔ برطانوی ہائی کمشنر جین میریٹ بلوچستان اٹ برجاشونداری گام گیج، اصلاحاتی پروگرام و السی خذمت کن حکومت نا کوشست آتا ستاءِ کرسا چندی بشخ آتیٹی کمکاری ءِ پین ودفنگ اٹ استخواہی نا درشانی ءِ کرے۔