بلوچستان ءِ مون تروک ول ویچڑ چیلنج آک سنجیدہ گام گیج نا خواہندار ءُ،گورنر جعفرخان مندوخیل

گورنر بلوچستان جعفر خان مندوخیل پارینے کہ بلوچستان ءِ مون تروک ول ویچڑ چیلنج آک سنجیدہ گام گیج و مدامگی ایسری نا خواہندار ءُ۔ پاکستان نا زرگزرانی آخبت بلوچستان نا امن، سوگوی و شونداری تون گنڈوک ءِ۔ ہرا وڑ کہ امن آن بیدس شونداری مون آ ہننگ کپک، ہنداوڑ راجی انصاف و السی پتداری آن بیدس امن ہم برجا سلنگ کپک۔ گورنر مندوخیل پارے کہ پالیسی سازی و فیصلہ سازی نا ریسہ ٹی ورنا تا اواری ءِ پک کننگ بھاز المی ءِ تانکہ ہر ورنا پاکستان نا شونداری وشونہالی ٹی فعال شریدار جوڑ مرے۔ دا خیال آتا درشانی ءِ او جماعت اسلامی پاکستان نا بنجائی نائب امیر لیاقت بلوچ و صوبائی امیر و صوبائی اسمبلی نا باسک مولانا ہدایت رحمان تون گورنر ہاؤس کوئٹہ ٹی گپ و تران ناوخت آ کرے۔ دا وخت آ گورنر بلوچستان جعفر خان مندوخیل پارے کہ روشنا آخبت نا تفنگ ءِ پک کننگ کن اولیکو شڑت ننا ورنا تا اصل کڑد ءِ درست کننگ ءِ‘ ننا مچ آ آبادی نا غٹ آن بھلا بشخ ورنا تیا تالان ءِ ہرافتا خواری و تخلیقی لائخیک ننا غٹ آن بھلا واکداری نا نمائندگی ءِ کیرہ۔ گورنر مندوخیل پارے کہ اینو حالیت آتا گرج دادے کہ نن ہر وڑ انا جندی فائدہ غاتیان ایڑتر مرسا ملک و قوم انا شونداری و شونہالی کن اواری اٹ کاریم کین۔ سیاسی راہشون، مذہبی عالم و راج انا پامدار آ بندغ آتا زمواری ءِ کہ او اجتماعی فائدہ غاتے پیدوار کیر، پولیٹیکل ڈائیلاگ نا است بڈی ءِ کیر، راجی ہم گرنچی ءِ سوگو کیر و قوم انا شونداری ٹی عملی و گچین کڑد ادا کیر۔ گورنر بلوچستان جعفر خان مندوخیل پارے کہ نن اسیجائی کوشست آتا کمک اٹ اسہ پرامن، شونہال و شوندار بلوچستان اس جوڑ کننگ کینہ۔