امریکہ ایران مذاکرات کار آک ننے 10 دے انا جنگ بندی نا سلاہ تسنو،ایرانی بڑزکو کہولی عہدیدار
چک و تاڑ نا دے تیٹی ہم امریکہ تون خیرخواہ تا کمک اٹ سفارتی رابطہ غاک فعال ءُ، خیرخواہ تا کمک اٹ اہم ءُ سلاہ سر کننگانو، انٹرویو
Get real time updates directly on you device, subscribe now.
ایرانی بڑزکو عہدیدار پارینے کہ مذاکرات کار آک 10 دے انا جنگ بندی نا سلاہ تسنو۔ برطانوی خبر رساں ادارہ تون گپ و تران کرسا بڑزکو عہدیدار پارے کہ ایران، امریکہ عبوری معاہدہ نا بحالی کن سلاہ تننگانے، مذاکرات کار آک ایران امریکہ چک و تاڑ اٹی کمتی کن ہم سلاہ تسنو۔ ایرانی عہدیدار پارے کہ جنگ بندی نا مسخت مفاہمتی یادداشت ءِ بحال کننگ نا وڑ و ڈول آتے پٹوئی ءِ۔ جنگ بندی سلاہ ٹی ہرمز تنک ءِ 10 دے آن اِرا ہفتہ کن ملنگ آ سجفنگ انگ ءِ۔ ایران پارینے کہ داسہ نا چک و تاڑ نا دے تیٹی ہم امریکہ تون خیرخواہ تا کمک اٹ سفارتی رابطہ غاک فعال ءُ، خیرخواہ تا کمک اٹ اہم ءُ سلاہ ہم ننے اسکان سر کننگانو۔ ترجمان ایرانی وزارت خارجہ اسماعیل بقائی پارے کہ ایران، تینا قومی فائدہ غاتا بنداو آ جنگ و سفارت کاری ہڑتوم آ کسرتے ہرفک، سفارت کاری اسہ ہندن ءُ وسیلہ اسے ہرا نا کمک اٹ قومی فائدہ غاتے ہندن دوئی کینہ امر کہ جنگ انا کمک اٹ کینہ۔ ترجمان مستی پارے کہ ہرمز تنک انا بہانہ ءِ جوڑ کرسا ایران نا سلامتی و قومی فائدہ غاتے خطرہ ٹی شاغنگ نا موکل تفنہ۔ دا چک و تاڑ اٹی امریکہ ایران نا برخلاف فوجی کارروائی تیٹی ترندی اتنگ آن پد ہم سفارتی ایسری نا درگہ غاتے ملوک تخنگ نا درشانی کرینے‘ وخت اس کہ ایران پیدوار کرینے کہ او قومی فائدہ غاتا رکھ اکن دفاع و سفارت کاری ہڑتوم آ کسر تیا عمل کیک و مذاکرات نا کمک اٹ ہم تینا حق آتا رکھ انا دفاع ءِ برجا تخک۔ امریکی وزیر خارجہ مارکو روبیو پارینے کہ واشنگٹن ایران تون سفارت کاری کن داسہ ہم تیار ءِ ولے ہر وڑانا گمانی معاہدہ کن المی ءِ کہ او راستی آ تالان مرے و ایران اوڑا عمل کننگ کن سنجیدہ مرے۔ درملکی میڈیا نا رِد اٹ مارکو روبیو نا دا بیان ہندن ءُ وخت اسے آ مون آ بسنے ہراتم امریکہ ایران نا برخلاف تینا فوجی کارروائی تیٹی ترندی اتنگ اٹی ءِ‘ او پارے کہ “نن مدام سفارت کاری کن تیار مرینہ، ولے دا راستی آ تالان مرے و ہندن ءُ معاہدہ اس مرے ہراڑا ہڑتوم آ کنڈ آک عمل کننگ کن تیار مریر”۔ ایلو کنڈ آ ایران نا وزارت خارجہ نا ترجمان اسماعیل بقائی پارینے کہ ایران تینا خارجہ پالیسی و دفاعی سُج پام ءِ قومی فائدہ غاتا بنداو آ شین ایتک و سفارت کاری ءِ ہم دا سُج پام نا اسہ اہم ءُ بشخ اس سرپند مریک۔ صحافی تا دا سوج آ کہ گڑا امریکہ تون مذاکرات نا درگہ داسہ بند مسنے، اسماعیل بقائی پارے کہ او “جنگ یا سفارت کاری” نا ہڑتوم آ انتہا غا تالان سوچ ءِ مسترد کیک۔ او پارے کہ “ای جنگ یا سفارت کاری نا دا اِرا وڑ و ڈول نا سوچ ءِ مسترد کیوہ۔ سفارت کاری ہم اسہ ہندن ءُ وسیلہ اسے ہرا نا کمک اٹ نن تینا قومی فائدہ غاتا رکھ ءِ کینہ، ہندن امر کہ دفاعی پڑ آ تینا لائخی تے کاریم اٹ اتینہ”۔ ایرانی ترجمان مستی پارے کہ ہندن امر کہ سلہہ بند فوج ملک انا دفاع کن سوگو ءِ‘ ہندن سفارت کار آتا ہم زمواری ءِ کہ او دشمن نا زور شاغنگ و جتا جتا وڑ تیان پد ہم مذاکرات نا کمک اٹ ایران نا حق و قومی فائدہ غاتا رکھ ءِ کیر۔ امریکہ و ایران نا داسہ نا بیان تیان پیدوار مریک کہ ہڑتوم آ ملک آک سخت چک و تاڑ و فوجی جلہو تیان پد ہم سفارتی حال حوال نا گمان ءِ پورو وڑ اٹ مسترد کپننگ اٹی ءُ‘ ولے ہڑتوم آ کنڈ آتیا مذاکرات کن تینا تینا شڑٹ و موقف برجاءِ۔