کوئٹہ نا پبلک ٹرانسپورٹ الیکٹرک بس آتیا گدریفنگ نا سجفنگانے، سیکرٹری ٹرانسپورٹ بلوچستان

سیکرٹری ٹرانسپورٹ بلوچستان حیات کاکڑ پارینے کہ صوبائی حکومت کوئٹہ نا پبلک ٹرانسپورٹ نظام ءِ پوسکن و چاگڑد دوست جوڑ کننگ کن ریسہ وڑ اٹ پورو الیکٹرک بس آتیا گدریفنگ نا ڈٹ تیار کرینے، ہرانا رداٹ 27 پوسکن الیکٹرک بس ہلنگ نا عمل برجاءِ۔ او اے پی پی تون ہیت وگپ کرسا پارے کہ پوسکن آ بس آتا اوار مننگ آن ہڑدے مسافر آتا کچ 40 ہزار آن ودسا 50 ہزار اسکان سرمننگ نا اومیت ءِ، وخت اس کہ دا گام انا مسخت چاگڑدی کچٹی ٹی کمتی، ایندھن آ سیبو ءِ کم کننگ و شاری تے رکھ، آرام دہ و اڑزان سفری آسراتی فراوان کننگ ءِ۔ او پارے کہ بنجائی حکومت الیکٹرک وہیکل آتا مون آ دننگ کن نیو انرجی وہیکلز پالیسی 30۔2025 شین تسنے، ہرا مچ آ ملک انا غٹ صوبہ غاتیا لاگو ءِ۔ پالیسی نا رداٹ سرکاری و پرائیویٹ بشخ آتیٹی الیکٹرک گاڑی تا کاریم اٹ اتنگ، کاربن پیش تمنگ اٹی کمتی و چاگڑد دوست ٹرانسپورٹ نظام نا جوڑ کننگ آ چکار کننگ انگ ءِ۔ او پارے کہ ساڑی گرین بس ڈٹ کوئٹہ ٹی چاگڑد دوست پبلک ٹرانسپورٹ نا جوڑ کننگ نا کنڈ آ اسہ ریسہ سے۔ صوبائی حکومت پین 27 الیکٹرک بس اوار کننگ آ کاریم کننگ ءِ ہرافتے فنڈ آتا فراوانی آن پد شار انا 12 پوسکن آ فیڈر روٹ آتیا چلیفنگک۔ سیکرٹری ٹرانسپورٹ پارے کہ آخبت اٹی گرین بس آتے بلوچستان نا ایلو ضلع غاتیٹی گدریفنگک وخت اس کہ کوئٹہ شار اٹی پورو الیکٹرک پبلک ٹرانسپورٹ نظام درستی راستی کرفنگ نا ڈٹ ءِ۔ او پارے کہ پوسکن آ الیکٹرک بس آتا اوار مننگ آن نئے بیرہ پبلک ٹرانسپورٹ نا کاریم اٹ ودکی مریک بلکن پرائیویٹ گاڑی تیا شاری تا سیبو ہم کم مریک ہراٹی ٹریفک نا ویل و چاگڑدی کچٹی ٹی کمتی بریک۔ او پارے کہ الیکٹرک بس آتا سرسہبی کن بیرہ گاڑی ہلنگ گنج اس اف بلکن چارجنگ اسٹیشن، بجلی نا پدریسہ فراوانی و پوسکن تکنیکی انفراسٹرکچر نا تیاری ہم المی ءِ۔ بلوچستان حکومت دا بابت جوان ڈٹ بندی کننگ ءِ تانکہ آخبت اٹی اسہ گچین و مدامگی ٹرانسپورٹ نظام اس جوڑ کننگ مرے۔ او پارے کہ حکومت شار انا بنجائی کاروباری علاقہ غاتیٹی پوسکن چاگڑد دوست ٹرانسپورٹ آسراتی درستی راستی کرفنگ کن ہم گام گیج کننگ ءِ وخت اس کہ ایشین ڈویلپمنٹ بینک انا کمک اٹ بی آر ٹی و پوسکن ٹرانزٹ ڈٹ آتیا ہم چکار کننگ انگ ءِ۔ سیکرٹری ٹرانسپورٹ بلوچستان پارے کہ ساڑی گرین بس آک دُن تو پورو الیکٹرک افس بلکن یورو تھری آب انا ڈیزل انجن آتیا چلینگرہ، ہندا سوب آن دا متکن آ روایتی بس آتا مون اٹ کم مول کشرہ و چاگڑد آ کم زہم شاغرہ۔ او پارے کہ بلوچستان حکومت نا ہدف ءِ کہ 2030 اسکان کوئٹہ نا پبلک ٹرانسپورٹ نظام ءِ ریسہ وڑ اٹ پورو الیکٹرک بس آتیا گدریفنگے تانکہ شار ءِ پوسکن، ساف و چاگڑد دوست سفری آسراتی فراوان کننگ مرے۔