ڈپٹی کمشنر محمد رمضان پلال نا ای پی آئی پروگرام نا رِد اٹ ویکسینیٹرز آتے 21 پوسکن آ موٹر سائیکل تا فراوانی

صیر آباد: حکومتِ بلوچستان الس ءِ جانجوڑی نا بنداوی آسراتی تا فراوانی ءِ پک کننگ کن تینا غٹ وسیلہ غاتے کاریم اٹ اتنگ اٹی ءِ۔ ہندا ردوم اٹی محکمہ صحت نا توسیعی پروگرام برائے حفاظتی ٹیکہ جات (EPI) نا رِد اٹ ضلع اُستا محمد کن رسینگوک آ 21 پوسکن آ موٹر سائیکل تا بشخ و بانٹ نا بنائی دود سردار یار محمد جمالی میموریل ہسپتال اٹی اڈ ہلک۔ ڈپٹی کمشنر اُستا محمد محمد رمضان پلال دود نا باقاعدہ بنا ءِ کرے و موٹر سائیکل آتے ویکسینیٹرز تا حوالہ کرے، ہرافک ای پی آئی پروگرام نا رِد اٹ خذمت سر انجام تننگ اٹی ءُ۔ دا وخت آ سردار ضرار خان جمالی ہم ساڑی ئس۔دود نا چاروکی ءِ ڈسٹرکٹ ہیلتھ آفیسر ڈاکٹر امیر علی جمالی، ڈپٹی ڈی ایچ او ڈاکٹر قرار حسین و ڈی ایس وی ثناء اللہ لاشاری کریر، وخت اس کہ منصور حسین، ڈاکٹر خلیل احمد، ڈی پی او ڈاکٹر مقبول احمد جمالی، صدر پیرا میڈیکل اسٹاف اُستا محمد معشوق علی جمالی، ٹی پی او فدا حسین لاشاری، ویکسینیٹرز و محکمہ صحت نا ایلو افسر و عملہ غاک ہم دود اٹی بشخ ہلکر۔ دا موقع آ تران کرسا ڈپٹی کمشنر اُستا محمد محمد رمضان پلال پارے کہ حکومتِ بلوچستان نا خاص آ چکار و ضلع اُستا محمد نا ویکسینیٹرز نا پدریسہ محنت نا سوب آن دا 21 موٹر سائیکل آتے فراوان کننگانے، ہرا حفاظتی ٹیکہ جات نا فراوانی نا نظام ءِ مستی بھرمی، ترند و منظم جوڑ کننگ اٹی اہم ءُ کڑد اس ادا کیرہ۔او مستی پارے کہ پوسکن آ موٹر سائیکل تا فراوانی آن ویکسینیٹرز ءِ مر انگا، پدتموک و دشوار گزار علاقہ غاتیا وخت آ رسینگک مریک، ہراڑان ہڑدے ئی حفاظتی ٹیکہ جات نا کوریج اٹی نمان ودکی ممکن مریک۔ دود آن تران اٹی ایلو ترانکار آک پاریر کہ دا گام گیج آن چناتے خسرہ، پولیو، ٹی بی، ہیپاٹائٹس و ایلو مہلک ناجوڑی غاتون اوار مچ آ 15 خطرناک آ ناجوڑی غاتیان بچفنگ اٹی بھلو کمک اس ملک۔