نصیر آباد: ڈی سی وریندر لعل نا پارت آ اے سی بشیر احمد قیصرانی نا شونداری ڈٹ آتا خوڑتی اٹ جاچ

صیر آباد: ڈپٹی کمشنر نصیر آباد وریندر لعل نا پارت آتا رِد اٹ اسسٹنٹ کمشنر بشیر احمد قیصرانی، اسسٹنٹ ڈائریکٹر لوکل گورنمنٹ احمد نواز جتک و ایس ڈی او بی اینڈ آر عابد علی پہنور تون اوار پورو مروک آ ٹف ٹائلز نا ڈٹ آتا تفصیلی دورہ ءِ کرے۔ دا وخت آ جتا جتا علاقہ غاتیٹی پورو مروک آ گلی و کسر تا کاریم نا خوڑتی اٹ جاچ ءِ ہلنگا۔ ہرا ہند آتا معائنہ کننگا اوفتیٹی ٹی اینڈ ٹی (T&T) کالونی، اقبال ٹاؤن، این-65 آن بلال عمرانی ہاؤس، بلال عمرانی ہاؤس آن ماڈل ہائی سکول ڈیرہ مراد جمالی، حاصل خان سولنگی محلہ، لانگو محلہ، مری محلہ، علی مردان پلال محلہ، مرتضیٰ منگی ڈگری کالج، ارشاد علی جمالی محلہ و خان محمد سیال محلہ اوار ءُ۔ دورہ نا وخت آ ہیت و گپ کرسا اسسٹنٹ کمشنر بشیر احمد قیصرانی پارے کہ ڈپٹی کمشنر نصیر آباد نا کنڈ آن سختی اٹ پارت جاری کننگانے کہ السی آسودہی کن پورو کروک آ شونداری ڈٹ آتا آب ءِ ہر حال اٹی برقرار تخنگے۔ او پاش کرے کہ ہچ ءُ وڑ اسے نا غیر معیاری کاریم اس اسُل سگنگ مپک و زموار آتا برخلاف کانودی کارروائی عمل اٹی اتنگ مرو۔ او مستی پارے کہ الس ہم تینا زمواری نا احساس ءِ کیر و تینا علاقہ غاتیٹی برجا یا پورو مروک آ شونداری کاریم تیا نظر تخیر۔