بنجائی وزیر خزانہ نا چنکا و نیامی درجہ نا کاروبار ءِ مالی کمک فراوان کننگ کن ٹاسک فورس اس اڈ تننگ نا پڑو

بنجائی وزیر خزانہ و بنگ سینیٹر محمد اورنگزیب چنکا و نیامی درجہ نا کاروبار ءِ مالی کمک فراوان کننگ کن ٹاسک فورس اس اڈ تننگ نا پڑو کرسا پارینے کہ پرائیویٹ سیکٹر ءِ وام تا فراوانی ٹی ودکی کن مچ آ بینکاری بشخ انا اسیجائی کوشست آتا گرج ءِ۔ حکومت مالیاتی سیکٹر اٹی اصلاحات و مدامگی زرگزرانی شونداری نا گیشتر ایجنڈا غا عمل کننگ ءِ۔ او دا ہیت ءِ سے شنبے نادے آ کراچی ٹی اڈ ہلوک آ پاکستان بینکنگ سمٹ 2026 آن تران کرسا کرے۔ وزیر خزانہ پارے کہ ٹاسک فورس اسٹیٹ بینک نا کماشی ٹی کاریم کیک ہراٹی پاکستان بینکس ایسوسی ایشن، سمال اینڈ میڈیم انٹرپرائزز ڈویلپمنٹ اتھارٹی (سمیڈا)، مچ آ ملک انا چیمبرز آف کامرس اینڈ انڈسٹری و وزارت خزانہ نا بڑزکو نمائندہ غاک اوار مریرہ، دانا مسخت ایس ایم ایز کن مالی کمک ءِ گچین کننگ و بینکاری بشخ اٹی وام تسکان رسینگ ءِ پین ودفنگ کن عمل نا قابل سلاہ و سوج ترتیب تروئی مریک۔ سینیٹر محمد اورنگزیب پارے کہ مدامگی زرگزرانی شونداری نا دوئی کننگ کن بینکاری بشخ انا کڑد بھاز اہم ءِ۔ وزیر خزانہ پارے کہ چنکا و نیامی درجہ نا کاروبار، برآمد، کشاری، صنعت، تفوئی کاریم‘ ہاؤسنگ و انفارمیشن ٹیکنالوجی نا بشخ آتے وام تا فراوانی ٹی ودکی وخت انا اہم گرج ءِ۔ او دا ہیت آ زور شاغا کہ ایس ایم ایز آتے مالی آسراتی تا فراوانی بیرہ منہ ادارہ غاتا اف بلکن مچ آ بینکاری بشخ انا اسیجائی قومی زمواری بایدے مرے، مالی سال 27-2026 نا بنجائی بجٹ اٹی دا بشخ آتے کن المی مالی وسیلہ مہالو آن جتا کننگانے۔ وزیر خزانہ پاکستان نا گچین مروک آ زرگزرانی حالیت آتا ذکر ءِ کرسا پارے کہ تدوک آ مالی سال سوگو بنداو تیا ایسر مس۔ او پارے کہ بنداوی مالیاتی سرپلس، ساڑی سال تا کم انگا مالیاتی نسخان، وام تا گچین ٹک، برجا حساب نا کھاتہ غاتا سوگو کارکڑد، زرراہی تس نا ریکارڈ بننگ‘ زرکوڑی تیٹی ودکی و پاکستان نا جہانی مالیاتی منڈی تسکان دُوارہ رسینگ (ہراٹی ملک انا اولیکو پانڈا بانڈ ہم اوار ءِ) دا مثبت پیش رفت نا نمان الم آک ءُ۔