السی ویل آتا ایسری کن کل وسیلہ غاتے کاریم اٹ اتنگ اُن،میر لیاقت لہڑی

پارلیمانی سیکریٹری ٹرانسپورٹ میر لیاقت لہڑی پارینے کہ السی ویل آتا ایسری کن غٹ ساڑی وسیلہ غاتے کاریم اٹ اتنگ انگ ءِ۔ گچین کاری حلقہ ٹی کروڑ آ روپئی تا خڑچ آن شونداری کاریم آک ترندی اٹ برجا ءُ ہرافتا پورو مننگ آن الس ءِ بنداوی آسراتی اوفتا درگہ غا رسینگ اٹی کمک رسینگک۔ حلقہ نا الس ہرا ویل آتا مون آایسنو اوفتے ایسر کننگ کن ہر وڑ انا کوشست کننگک۔ دا ہیت ءِ او یکشنبے نا دے لہڑی ہاؤس کوئٹہ ٹی اوڑدہی کن بروک قبائلی و سیاسی راہشون و حلقہ نا الس تون گپ و تران کرسا پارے۔میر لیاقت لہڑی پارے کہ پاکستان پیپلز پارٹی رنگ و نسل انا فرق آن بیدس الس نا خذمت آ باور تخک و السی ویل آتے ایسر کننگ کن کل وسیلہ غاتے کاریم اٹ اتنگ انگ ءِ۔ تاریخ اٹی اولیکو وار پیپلز پارٹی نا سیوتی حکومت صوبہ نا غٹ حلقہ غاتے بریبر فنڈ آتا فراوانی ءِ پک کرینے و صوبہ ٹی ارب آ روپئی تا خڑچ آن شونداری ڈٹ آتیا کاریم برجاءِ۔ او پارے کہ کنا کوشست ءِ کہ تینا گچین کاری حلقہ نا الس کن سفا انگا دیر، جانجوڑی نا آسراتی تون اوار ایلو بنداوی آسراتی تا فراوانی ءِ پک کننگ مرے تانکہ الس نا خواری تیٹی کمتی برے۔ او پارے کہ اونا ایم پی اے فنڈ آن حلقہ ٹی کروڑ آ روپئی تا خڑچ آن شونداری ڈٹ آتیا کاریم برجاءِ و کیہی ڈٹ آک پورو ہم مسنو ہرافتیان الس فائدہ ہرفنگ اٹی ءِ۔ حلقہ نا الس ہرا ویل آتے پاش کرینے، اونا کوشست مریک کہ ہمو ویل آتے اولیت نا بنداو آ ایسر کننگے۔