یوتھ انگیج منٹ پلان بلوچستان حکومت نا کل آن اہم انگا پروگرام ءِ،وزیراعلیٰ میر سرفراز بگٹی

وزیراعلیٰ بلوچستان میر سرفراز بگٹی پارینے کہ بھاز تپہ غاک بے گوا بندغ و السی حق آتا پلو ءِ ہلسا ورنا چین ءِ بیدادی آ وگائفنگ و ریاست مخالف بیانیہ ءِ مون آ اتنگ نا کوشست کننگ اٹی ءُ ولے دا وڑ انا کاریم تے ہچ وڑ اٹ سرسہب مننگ کن الیپنہ۔ او پارے کہ پاکستان نا بھاز کسب کار، منظم و بود تخوک سلہہ بند فوج، پیرا ملٹری فورس آک، پولیس و لیویز نا ساڑی گری ٹی منہ بیداد کروک آ بندغ ریاست نا رٹ ءِ چیلنج کننگ نا بود تخپسہ۔ دا ہیت ءِ او راجی رابطہ نا پلیٹ فارم ایکس آ اڈ ہلوک اوپن ایکس اسپیس اٹی جتا جتا تپہ غاتیان تعلقدار بندغ، ورنا چین، سب نیشنلسٹ حلقہ، این جی اوتا نمائندہ، تقنید کروک و سول سوسائٹی نا باسک آتا سوج آتا ورندی ءِ ترسا کرے۔ اوپن اسپیس اٹی اسہ وخت آ شریدار آتا کچ 16 ہزار آن زیات مس ہراڑے وزیراعلیٰ سخت و تنقیدی سوج آتا ہم راستکی، حساب کتاب و شاہدی تا بنداو آ جم ورندی تس۔وزیراعلیٰ میر سرفراز بگٹی پارے کہ اونا حکومت نا اولیکو اولیت بلوچستان نا ورناک ءُ و ہندا مسخت کن یوتھ انگیج منٹ پلان حکومت نا کل آن اہم انگا پروگرام ءِ۔ او پارے کہ دا وخت آ حکومت ورنا تے قومی دنگ اٹی اواری، اوفتے مثبت وارخواہی فراوان کننگ و روشنا آخبت نا کنڈ آ گام کرفنگ کن 10 آن 12 جتا جتا ڈٹ آتیا کاریم کننگ اٹی ءِ۔ ورناتے نااومیتی، انتہاپسندی و بیدادی نا جاگہ غا تعلیم، ہنر، روزگار و شونداری نا وارخواہی فراوان کننگ مدامگی امن نا ضمانت ءِ۔ حکومت ہر ضلع نا گرج و زرگزرانی لائخی ءِ مون آ تخسا جتا جتا شونداری ڈٹ جوڑ کننگ اٹی ءِ ہراٹی گوادر نا ورنا تا کنڈ آن فشریز و سمندری زرگزران تون تعلقدار خاص وارخواہیک ہم اوار ءُ، وخت اس کہ ایلو ضلع غاتا کنڈ آن ہم ہندی گرج آتا رِد اٹ ڈٹ ترتیب تننگ انگ ءِ۔ دا ڈٹ آتے ایپکس کمیٹی نا منظوری آن پد ریسہ ئی وڑ اٹ نافذ کننگ انگ ءِ۔ وزیراعلیٰ پارے کہ بھاز آ تپہ غاک بے گوا بندغ و السی حق آتا پن آ ورنا تے بے کسر کننگ و اوفتے بیدادی نا کسر آ شاغنگ نا کوشست کریر۔ دا وڑ انا تپہ غاک جتا جتا علاقہ غاتیا ہنسا ورنا تے ریاست نا برخلاف وگائفنگ و بیداد کروک کارروائی تا کنڈ آ دننگ نا کوشست کریر ولے حکومت ورنا چین ءِ مثبت سرجز، تعلیم، مکالمہ و روزگار نا کمک اٹ قومی دنگ اٹی اوار کننگ کن پُرعزم ءِ۔ میر سرفراز بگٹی پارے کہ حکومت بلوچستان اولیکو وار پنشن نا نظام اٹی جوانی ایسنے، تدوک آ مالی سال اٹی غیر شونداری خڑچ آتیٹی 14 ارب روپئی نا کمتی کرے، وخت اس کہ صوبہ ٹی الیکٹرک وہیکلز پالیسی ہم درستی راستی کرفنگ انگ ءِ تانکہ پوسکنوڑ، چاگڑد دوست و مدامگی ٹرانسپورٹ نظام ءِ شون تننگ مرے۔ او پارے کہ حکومت مالی نظم و ضبط جوڑ کرسا زکوۃ نا بشخ و پانٹ نا متکن آ نظام اٹی بنائی جوانی ایسنے۔ مستین 60 کروڑ روپئی نا زکوٰۃ بشخنگ کن اسہ ارب 30 کروڑ روپئی انتظامی خڑچ آتیا خڑچ مسکہ ولے داسہ حکومت زکوٰۃ محکمہ ءِ چٹفسا دا وسیلہ غاتے بلوچستان ایجوکیشن اینڈومنٹ فنڈ اٹی گدریفینے ہراڑے داسہ حقدار و لائخ آ طالب علم آتے اسکالرشپ تننگ انگ ءِ۔