پنجگور نا پوریاگر تا کل روا انگا ویل آتا ایسری کن کاریم کننگک،صدر انجمن تاجران

پنجگور نا پوریاگر برادری و جتا جتا واپاری سرکڑدہ غاتا اسہ ڈل اس انجمن تاجران پنجگور نا صدر فرید احمد تون اونا دفتر اٹی اوڑدہی کرے۔ دا وخت آ انجمن تاجران نا سینئر نائب صدر لال دوست شعیب، سیکرٹری جنرل قائم الدین، ڈپٹی سیکرٹری فدا احمد، نائب صدر دوئی حاجی محمد اکرم شاکر، لیبر سیکرٹری حاصل خان، سرپرستِ اعلیٰ عطا محمد، سوزی منڈی یونین نا صدر حاجی حبیب اللہ، محمد انور نور تون اوار کمیٹی نا ایلو باسک و پوریاگرک بھلو کچ اسے ٹی ساڑی ئسر۔ اوڑدہی ٹی پنجگور بازار نا شونداری، برجا و بروک آ شونداری ڈٹ آتیا، پوریاگر تے پیش بروک ویل و اوفتا بھرمی چٹفنگ آ خوڑتی اٹ گپ و تران کننگا۔ انجمن تاجران نا کمیٹی پوریاگر آتے باور کرفے کہ اوفتا غٹ روا انگا ویل آتا ایسر و بازار نا جوانی کن تینا غٹ لائخی تے کاریم اٹ اتنگک و ہر وڑ اٹ کمکاری ءِ برجا تخنگک۔ صدر انجمن تاجران فرید احمد تینا تران اٹی پارے کہ ہرا کاریم ننا واک اٹی ءُ، اودے پورو کننگ کن نن پدریسہ جہد کننگ اٹی اُن۔ او پارے کہ پوریاگر برادری ءِ سیوت، سگ اٹ مونی ہنوئی ءِ ا نتئے کہ ہر ویل انا ایسر ہڑدڑ اٹی اف بلکہ جوان گپ و تران، سلابت و سُج پام اٹ ڈکوک ءِ۔ او مستی پارے کہ مستین منہ بندغ جندی فائدہ و پروپیگنڈہ ءِ ودفسا بازار نا شونداری ءِ نسخان تسر‘ ولے داسہ وخت بسنے کہ جم فائدہ ءِ جندی فائدہ غا اولیت تننگے۔ صدر انجمن تاجران پارے کہ میونسپل کارپوریشن نا میئر شکیل احمد قمبرانی و چیف آفیسر عزت اللہ محمدحسنی تون پدریسہ رابطہ ٹی اُن، و انشاء اللہ دمدستی وڑاٹ سوزی منڈی ٹی شیڈ و ٹف ٹائل نا ڈٹ آتیا کاریم بنا کننگک، ہراڑان پوریاگر و الس ءِ نمان آسودہی رسینگک۔ او پوریاگر آتیا زور شاغا کہ او تینا واک ءِ کاروبار نا جوانی، تینا چناتا روشنا آخبت و بازار نا شونداری آ خڑچ کیر، وخت اس کہ انجمن تاجران ہر روا انگا ویل اٹی اوفتتون ہم کوپہ سلیسنے۔ دا وخت آ پوریاگر برادری انجمن تاجران نا جہد انا ستاءِ کرے و پکا عزم انا درشانی ءِ کریر کہ او آخبت اٹی ہم بازار نا شونداری و سیوت کن انجمن تاجران تون اوار بھرمی کڑد ادا کرسا کیک۔، (نامہ نگار)