سارک گیمز نا تیاری کن اسلام آباد اٹی سیکرٹریٹ جوڑ کننگک،نائب وزیراعظم اسحاق ڈار

نائب وزیراعظم و وزیر خارجہ سینیٹر اسحاق ڈار نا کماشی ٹی پاکستان اٹی 2027 سارک گیمز نا تیاری تا جاچ ءِ ہلنگ کن اسہ بڑزکو کہولی دیوان اس اڈ ہلک، ہراٹی گوازی تا دا بھلا جہانی دود انا تیاری تے ترند کننگ کن کیہی اہم فیصلہ کننگا۔ دیوان اٹی فیصلہ کننگا کہ اسلام آباد اٹی دمدستی وڑاٹ سارک گیمز سیکرٹریٹ جوڑ کننگک تانکہ کل انتظامی، تکنیکی و رابطہ باندات آتے بھرمی وڑاٹ مونی دننگ مرے۔ اعلامیہ نا رِد اٹ پاکستان اسپورٹس کمپلیکس نا اپ گریڈیشن نا کاریم ءِ ہم ترند کننگ نا پارت کننگا تانکہ گوازی تا آسراتی تے جہانی آب انا رِد اٹ جوڑ کننگ مرے۔ دیوان اٹی مالیات، انفراسٹرکچر و گوازی نا ہند آتا تیاری و چاروکی کن جتا جتا کمیٹی ٹہیفنگ نا ہم فیصلہ کننگا، ہراکہ تینا بشخ آتیٹی شونداری نا چاروکی ءِ کیرہ و وخت آ سلاہ تے پیش کیرہ۔ نائب وزیراعظم اسحاق ڈار دا وخت آ پارے کہ حکومت 2027 سارک گیمز ءِ جہانی آب انا رِد اٹ سرسہبی اٹ اڈ تننگ کن عزم کرینے۔ او پارے کہ قومی گوازی تا فیڈریشن آتے گوازی گر تا تیاری، ہیلکاری و واکداری ٹی ودکی کن ہر وڑ انا کمک فراوان کننگک۔ او مستی پارے کہ حکومت مچ آ ملک اٹی گوازی تا شون و ورنا ٹیلنٹ نا است بڈی کن سنجیدہ گام گیج کننگ اٹی ءِ، وخت اس کہ دا وڑ انا جہانی گوازی تا گوک دنیا ٹی پاکستان نا مثبت آ دروشم ءِ پین سوگو کننگ اٹی اہم ءُ کڑد اس ادا کیرہ۔ دیوان اٹی بنجائی وزیر رانا ثناء اللہ خان، طارق باجوہ، پاکستان اسپورٹس بورڈ و ایلو تعلقدار کمامدار آک بشخ ہلکر۔