روس و یوکرین نا نیام اٹ امن معاہدہ کن مذاکرات کرفنگ اُٹ،ڈونلڈ ٹرمپ نا دعویٰ

واشنگٹن، امریکی صدر ڈونلڈ ٹرمپ پارینے کہ ای روس و یوکرین نا نیام اٹی برجا جنگ اٹی امن کن مذاکرات کرفنگ اٹی اُٹ، روسی برآمد آتا بابت رکھ و ٹیرف ءِ اینک کننگ نا فیصلہ روس ءِ مذاکرات نا میز آ اتنگ نا اسہ کوشست اسے۔ صدر ڈونلڈ ٹرمپ ٹروتھ سوشل آ بیان جاری کرسا پارے کہ روس اتون تعلقدار کنا فیصلہ اسُل ساف ءِ‘ ای روس و یوکرین نا نیام اٹی جنگ اٹی امن معاہدہ کن مذاکرات کننگ اٹی اُٹ و دن ءُ ہچ ءُ گام اس ہرفنگ خواپرہ ہراڑان روس مذاکرات نا میز آن مُر مرے۔ ٹرمپ پارے کہ دا باندات اٹ نمان پیشرفت مننگ اٹی ءِ، ہراٹی بندی تے یلہ کننگ تون تعلقدار برجا مذاکرات ہم اوار ءِ‘ روسی برآمد آتا بابت رکھ و ٹیرف ءِ اینک کننگ نا فیصلہ روس ءِ مذاکرات نا میز آ اتنگ نا اسہ کوشست اسے۔ امریکی صدر پارے کہ دا وخت آ شاید داڑان ہم زیات اہم ہیت دادے کہ روس ایران نا کمک کن بھاز کم، یا اسُل ہچ ءُ کاریم اس کپننگ اٹی ءِ، ایہن او داڑان زیات کمک کننگ کریکہ‘ ای خواوہ کہ حالیت آک ہندن مریر و ہندن مریرہ‘ تانکہ آمخ آبندغ آک داٹی اڑاند مفس۔ ٹرمپ پارے کہ یوکرینی صدر زیلنسکی روس اٹی ڈیزل ریفائنری تے شست کننگ اٹی ءِ، انتئے کہ اودے سماءِ کہ دا جلہو آتیان جہانی ڈیزل مارکیٹ ترندی اٹ زہمی مننگ اٹی ءِ، ہراٹی امریکہ ہم اوار ءِ۔ او پارے کہ کشارگر، مالدار و ہر وڑ انا کاروبار دا حالیت آن بھاز زہمی مننگ اٹی ءِ ولے داکان پد ہم روس کم نہاد آ لکھ آ بیرل ڈیزل جہانی منڈی ٹی راہی کننگ اٹی ءِ۔ ٹرمپ پارے کہ زیلنسکی ءِ ہچ ءُ پرواہ اس اف۔ راستکی تو دادے کہ یورپ نا کنڈ آن اودے پاننگوک وڑ اٹ بھلو مالی کمک تننگ انگ ءِ و مستین اٹی وڈی خور جو بائیڈن ہم اودے پیسہ تسوسس۔