شونہالی نا وسیلہ غاتیٹ ودکی کن زرگزرانی نظام اس پک کروئی تمک ،پروفیسر احسن اقبال

اسلام آباد، بنجائی وزیر ڈٹ بندی، شونداری و خصوصی گام گیج پروفیسر احسن اقبال ملکی برآمد ءِ 100ارب ڈالر اسکان سر کننگ کن ”مشن 100ارب ڈالر“ نا لائحہ عمل ءِ پیش کرسا پارینے کہ اڑان پاکستان نا رداٹ ہشت اولیتی بشخ آتیٹی کلسٹرزنا بنداو آ شونداری و جہانی سپلائی چینزتون سوگو رابطہ کروئی مریک تانکہ ملک زرگزرانی وتواجہی ءِ دوئی کرسا تینا شونداری کن درکار وسیلہ تینٹ ودی کننگ کے۔ پاکستان انسٹی ٹیوٹ آف ڈویلپمنٹ اکنامکس (پائیڈ) اٹ پاکستان سوسائٹی آف ڈویلپمنٹ اکنامسٹس نا 39می سالانہ کانفرنس آ ن تران کرسا بنجائی وزیر پارے کہ ننے ہندن ءُ زرگزرانی نظام اس جوڑ کروئی مریک ہرا تینا شونہالی نا وسیلہ تینٹ ودی کے۔ شونداری کن مالی وسیلہ فراوان کے و زرگزرانی آخبت نا فیصلہ غاتے تینٹ کننگ نا لائخی تخے۔ او تقابلی حساب وکتاب پیش کرسا پارے کہ کیلنڈر سال 2024اٹ پاکستان نا گڑاتا برآمد کم و ود 32.3ارب ڈالر ئس وخت اس کہ بنگلہ دیش نا برآمد 47.2ارب ڈالر، ملائیشیا نا 330.4ارب ڈالر او ویت نام نا 404.8ارب ڈالر ئس‘ دافتے ٹی خذمت آتا برآمد اوار اف۔ پروفیسر احسن اقبال پارے کہ زرگزرانی سوگوی ءِ برجا تخسا پیداواری لائخی و جہانی منڈی تیٹی گوبر ءِ ودفنگ المی ءِ تانکہ پیشن نا وام تا پدریسہ زور انا مون ءِ توننگ مرے، دا مسخت کن داڑکن ہندن ءُ برآمدی کلسٹرز جوڑ کروئی مریک ہراڑے پیداواری ادارہ غاتے چاہندار سپلائرز، کسبکار ہیومن ریسورس، یونیورسٹی، پٹ وپولی لیبارٹری، مالی وسیلہ، ہن بر نا آسراتی و جہانی ہلوک آتتون اوار کننگے۔ اوپارے کہ برآمدات آتے ودفنگ نا حکمت عملی نا رداٹ کشت وکشار، صنعت و مینوفیکچرنگ، خذمت، انفارمیشن ٹیکنالوجی، کان کنی، بندغی قوت و کسبکاری، سمندری زرگزران و تخلیقی صنعت آتیا چکار کننگک۔