قلات و پسنی ٹی کارروائی تیٹی ”فتنہ الہندوستان“ نا 4دہشت گرد خلنگار،آئی ایس پی آر

راولپنڈی، سیکورٹی فورس آک بلوچستان نا ضلع قلات و گوادر اٹی گچین انٹیلی جنس بیسڈ آپریشن آتا وخت آ بھارتی کاٹم خواجہی ٹی کاریم کروک آ ٹولی ”فتنہ الہندوستان“ نا 4 دہشت گرد آتے دوزخی کریر، وخت اس کہ پسنی ٹی آپریشن نا وخت آ دیسی ساختہ بمب (آئی ای ڈی) نا دھماکہ ٹی دستہ نا کماشی ءِ کروک آمیجر وجاہت وحید فرض انا کسر اٹی شہیدی نا جام ءِ نوش کرے۔ انٹر سروسز پبلک ریلیشنز (آئی ایس پی آر) نا رداٹ انٹیلی جنس ایجنسیک ضلع گوادر نا تحصیل پسنی نا علاقہ شادی کور و ضلع قلات نا علاقہ جھٹک آباد اٹی بھارتی کاٹم خواجہی ٹی کاریم کروک ”فتنہ الہندوستان“ نا چندی ہند آتا ساڑی گری نا حوال تسر، ہراڑان ہندی آبادی ءِ بھلو خطرہ اس مون تروک ئس۔ ہندی آبادی نا رکھ و علاقہ ءِ دہشت گرد آتیان پاک کننگ کن سیکورٹی فورس آک دا علاقہ تیٹی آپریشن کننگ ءُ۔ آئی ایس پی آر نا رداٹ اولیکو واقعہ ٹی 18 اکتوبر 2026ء آ سیکورٹی فورس آک ضلع قلات نا عمومی علاقہ جھٹک آباد اٹی انٹیلی جنس آ تالان آپریشن کریر۔ آپریشن نا وخت آ ننا ورناک دہشت گرد آتا جاگہ غاتے گچین وڑ اٹ شست کریر و اسہ ایلو آ بھاز سم کاری آن پد چار دہشت گرد آتے دوزخی کننگا۔ دا وخت آ بھلو کچ اسے ٹی سلہہ و منچر ہم دوئی کننگا۔ ارٹمیکو واقعہ ٹی سیکورٹی فورس آک ضلع گوادر نا تحصیل پسنی نا علاقہ شادی کور اٹی کلیئرنس آپریشن آتا ریسہ نا بناءِ کریر‘ دافتیان اسہ آپریشن اسے نا وخت آ لیڈ فورس انا دستہ ءِ ہرانا کماشی ءِ میجر وجاہت وحید (وئی 34 سال، ہنکینی لاہور) کریکہ، اسہ دیسی ساختہ بمب اسے اٹ شست کننگا۔ دھرتی نا دا بہادر گلزادہ میجر وجاہت وحید فرض انا کسر اٹی عظیم قربانی ترسا شہیدی نا جام ءِ نوش کرے۔ علاقہ ٹی ساڑی ایلو دہشت گرد آتا چٹفنگ کن سینیٹائزیشن آپریشن برجاسلک۔ آئی ایس پی آر پارینے کہ نیشنل ایکشن پلان نا فیڈرل ایپکس کمیٹی نا منظور کروک وژن ”عزمِ استحکام“ نا رداٹ دہشت گردی تور نا پدریسہ مہم پورو واک اتون برجاسلک۔ سیکورٹی فورس و کانود نافذ کروک ادارہ غاک ملک آن درملکی کاٹم خواجہی و مخ تف دہشت گردی نا لعنت ءِ ماس آن چٹفنگ کن سنبرینگوک ءُ۔ وزیراعظم محمد شہباز شریف بلوچستان نا ضلع قلات و گوادر اٹ بھارتی کاٹم خواجہی ٹی کاریم کروک فتنہ الہندوستان نا برخلاف سرسہب آپریشن تیٹی 4دہشت گرد آتے دوزخی کننگ آ سیکورٹی فورس آتے خراج تحسین و پسنی ٹی آئی ای ڈی دھماکہ ٹی شہیدی نا جام ءِ نوش کروک آ 34 سال انا میجر وجاہت وحید شہید ءِ خراجِ عقیدت پیش کرینے۔ دوشنبے نادے آ پی ایم آفس نا میڈیا ونگ آن جاری بیان نا رداٹ وزیراعظم پارے کہ میجر وجاہت وحید وطن عزیز نا رکھ اکن تینا جان ءِ ندر کرے، قوم ءِ تینا بہادر گلزادہ غاگمر ءِ۔ وزیراعظم شہید میجر نا خاہوت تون ہمدردی نا درشانی و شہید نا درجہ غاتا بڑزی کن دعا کرے۔ او ایپکس کمیٹی نا وژن ”عزمِ استحکام“ نا رداٹ درملکی مخ تف دہشت گردی نا پورو چٹفنگ اسکان جنگ ءِ برجاتخنگ نا ارادگی نا درشانی ءِ کرے۔