عملی سیاست اٹی السی سلاہ سرسہب سُج پام نا کسر ءِ ملنگ نا سوب مریک،گورنربلوچستان جعفر مندوخیل

گورنر بلوچستان جعفر خان مندوخیل پارینے کہ عملی سیاست اٹی السی سلاہ ہمو بنداو ءِ ہرا نا رِد اٹ اسہ سرسہب ءُ سیاسی سُج پام اس ٹہیفنگ مریک۔ الس نا مہر، شرف و مخ تفی اسہ لیڈر نا وقار و پت ءِ پک کیک۔ لیڈر یا بیوروکریٹ ہچ گہس ڈرائنگ روم و سرکاری دفتر آتیٹی تولوک الس نا حقی ویل و خواری تے پہہ مننگ کپک۔ ساڑی راستکی تا جوان درک خلنگ کن الس تون دراست ہیت و گپ المی مریک۔ گورنر مندوخیل پارے کہ السی خذمت نا جوزہ اٹ اوار مرسا ننا ڈویژن نا کہولی جرگہ غاتا اڈ تننگ نا مسخت بیرہ جلسہ کننگ اف بلکہ مخلوق ءِ دراست بننگ، اوفتا اصلی ویل آتے پہہ مننگ و عملی ایسری کشنگ ءِ۔ دا خیال آتا درشانی ءِ او آواران اٹی السی جرگہ غان تران کرسا کرے۔ دا وخت آ وزیراعلیٰ بلوچستان میر سرفراز بگٹی، کمانڈر 12 کور لیفٹیننٹ جنرل راحت نسیم احمد خان، چیف سیکرٹری بلوچستان شکیل قادر خان، آئی جی پولیس طاہر خان، سیاسی راہشون، قبائلی متبر، عالم دین‘ و ضلعی انتظامیہ تون اوار جتا جتا بشخ آتیان تعلقدار بندغ آتا بھلو کچ اس ساڑی ئس۔ گورنر بلوچستان جعفر خان مندوخیل شریدار بندغ آتے پارے کہ السی سیاست نے دا ہیل ایتک کہ اسہ سیاسی راہشون اس تینا الس تون خڑکی و پدریسہ تعلقداری نا سوب آن عزت و عظمت دوئی کیک۔ الس نا توار، گڑتی و استخواہی مدام ننا فیصلہ و پالیسی تا راہشونی ءِ کیک۔ او پارے کہ جرگہ ننا قومی مڈی و ربیدگی آ زند انا اسہ نہادی ءُ بشخ اسے۔ کرن آتیان جرگہ غاک سلابت، مفاہمت و اسیجائی فیصلہ سازی کن اسہ شرفدار ءُ ادارہ اسے نا وڑاٹ کاریم کرینو۔ جرگہ تین پہ تینی شرف، اسیجائی زمواری و ننا قومی قدر آتا درشانی ءِ کیک۔ گورنر مندوخیل پارے کہ کنے پاکستان و خاص وڑاٹ بلوچستان نا آخبت بھاز روشنا نظر بریک۔